Բարդ իրավիճակ է. Կոստանյան

Այսօր խորհրդարանում լրագրողները ՀՀԿ-ական պատգամավոր Գևորգ Կոստանյանից հետաքրքրվեցին՝ ինչպե՞ս պետք է դուրս գալ ստեղծված իրավիճակից:

«Բարդ իրավիճակ է, և բարդ հարցեր եք տալիս, որոնց պատասխանը ես չունեմ»,- ասաց նա:

Անդրադառնալով այս օրերին շրջանառվող այն կարծիքներին, որ Հանրապետական կուսակցություն այլևս գոյություն չունի, Կոստանյանն ասաց, որ ցանկացած կուսակցություն` իր գաղափարախոսություններով և մոտեցումներով, գոյություն ունենալու իրավունք ունի, և ժխտողական գնահատականներ հնչեցնելը ճիշտ չէ:

Հարցին՝ արդյո՞ք մյուս շաբաթ ՀՀԿ-ն կքվեարկի Փաշինյանի օգտին, պատգամավորը պատասխանեց. «Դեռևս մեկ շաբաթ կա, հետո կխոսենք: Ինձ համար դժվար է Հանրապետականի դիրքորոշումը հայտնել, կանխատեսումներ անել: Դուք տեսել եք, որ ես այսքան ժամանակ կուսակցական որոշումների չեմ մասնակցել, որովհետև ես կուսակցական չեմ»:

Հարցին՝ արդյո՞ք Հանրապետականը մտադրված է խորհրդարանական ընտրությունների գնալ, Կոստանյանը պատասխանեց, որ նման հետևության հանգելու համար բացարձակ հիմքեր չկան, մինչդեռ դա սահմանադրական լուծում է, որը չի բացառվում: