Ինչպես են ապրում Աֆրինի խաղաղ բնակիչները

Ռուսական РИА Новости գործակալության լրագրողներն ուղևորվել են սիրիական Աֆրին` պարզելու` ինչպես են ապրում պատերազմի պայմաններում հայտնված խաղաղ բնակիչները: Լրագրողները ուղևորվել են Ջենդերես քաղաք:

«Պատկերացնո՞ւմ ես, նրանք կոչել են այս ռազմական գործողությունը «Ձիթենու ճյուղ»: Նրանք ուղղակի ձեռք են առնում մեզ: Ահա  ձիթենիները, դա խաղաղության խորհրդանիշն է, և դրանք մեր ծառերն են: Որպես գաղտնիք` ասեմ, թե ինչպես ենք կոչում մեր գործողությունը նրանց դեմ՝ «Աղվեսների որս»: Ներկայումս սահմանին իսկական որս է ընթանում»,- պատմել է բնակիչներից մեկը:

Սիրիական Աֆրին շրջանի Ջենդերես փոքրիկ քաղաքի բնակիչները պատմում են, որ հրթիռակոծությունները սկսվում են հիմնականում ցերեկը՝ ժամը 15։00-17։00-ն և երեկոյան 21։00-ից մինչև առավոտյան 5:00-ը: Հին քաղաքի տները գրեթե լրիվ փլուզվել են:

Մոտակայքում կա գյուղ, որտեղ ապաստանել են քաղաքի փախստականները: Գյուղի ավագ Խալթան Հասան Վասուկի խոսքով՝ մարդիկ ապրում են տեղի քարանձավներում: Հումանիտար իրավիճակն այստեղ աղետալի է, չի բավականացնում մթերքը և խմելու ջուրը: Բնակիչների հիմնական սնունդը ձիթենու յուղն է:

Աֆրինի միակ հիվանդանոցում բժիշկներն աշխատում են առանց հանգստյան օրերի, շատերն իրենց տները տվել են բնակիչներին, իսկ իրենք ապրում են հիվանդանոցում:

«Մենք հույս ունենք, որ Ռուսաստանը ճնշում կգործադրի Էրդողանի վրա, որպեսզի պատերազմը շուտ ավարտվի»,- ասել է լրագրողներին Վասուկը:

«Հորեղբա'յր, նրանք կգան մեր տներ ու բոլորիս կսպանե՞ն: Ի՞նչ է լինելու մեզ հետ: Իսկ եթե ռումբն ընկնի այս տան վրա, մենք բոլորս կմահանա՞նք»,- հարցնում է 8-ամյա Վիանը:

«Ոչ ոք չի մահանա, լեռներում գտնվող մեր տղաները չեն թողնի, որ մեզ նեղացնեն: Ավելի լավ է պարիր այս հորեղբոր հետ, նա չի վախենում և հաճույքով կսովորեցնի քեզ պարել, ինչպես պարում են երեխաները Ռուսաստանում»,- ասում է կանանցից մեկը:

Հիշեցնենք, որ Թուրքիան հունվարի 20-ին քրդերի դեմ ռազմական գործողություն է սկսել սիրիական Աֆրինում:

Մանրամասն` այստեղ: