Էս ո՞նց ես գոռում որ. Նորատուսցի Արան՝ դատախազին

Շենգավիթ վարչական շրջանի ընդհանուր իրավասության առաջին ատյանի դատարանում, դատավոր Նելլի Բաղդասարյանի նախագահությամբ, այսօր շարունակվեց 2016 թվականի նոյեմբերի 13-ին Չարբախում տեղի ունեցած` երկու անձի աղմկահարույց սպանության գործով հերթական դատական նիստը:

Այսօրվա նիստում ցուցմունք տվեց այս գործով վկա, դեպքի օրը հրազենային վիրավորում ստացած Արամ Պետրոսյանը: Նախաքննության ընթացքում նա ներգրավված է եղել որպես տուժող, սակայն հետագայում նրա դատավարական կարգավիճակը փոխվել է, և նա դարձել է վկա:

Երբ դատարանը Պետրոսյանին հիշեցրեց ցուցմունք տալուց հրաժարվելու և սուտ ցուցմունք տալու համար նախատեսված քրեական պատասխանատվության մասին, վկան արձագանքեց. «Փաստորեն, էլի կասկածվո՞ւմ եմ հանցագործության մեջ»:

Պետրոսյանը հայտնեց, որ ամբաստանյալներից ճանաչում է միայն իր ընկերոջը՝ Գեղամին (խոսքը ամբաստանյալ Պետրոս Իսրայելյանի մասին է): Նա պատմեց, որ դեպքից մի քանի օր առաջ Գեղամի հետ խոսել է Ճվճվ Արոյի պարտքի մասին (խոսքը հանրությանը հայտնի Արա Վարդանյանի մասին է, ով մահացել է 2017-ի հուլիսի 7-ին): Ըստ վկայի` մի բասարցի (վարդենիսցի) Արոյին 20.000 դոլար է պարտք եղել, որից 18.000-ը վերադարձրել է, մնացել էր 2000-ը:

«Ճվճվը Գեղամին ասել էր՝ հիվանդանոցում բուժվում եմ, ինձ փող ա պետք: Գեղամն ինձ ասում էր՝ Ճվճվին ասել ենք՝ ախպե'ր, 18 հազարը տվել ա, մնացած 2000 դոլար պարտքը կբերի, կտա: Հետո իմացա, որ մեկը կա՝ անունը Մուշո, էդ փողի մեջ շահ ունի, իրա ասելով էլ՝ էդի բիզնեսի փող ա՝ 18 հազարը բերել ա, հլը 20 հազար էլ պիտի բերի, տա»,- պատմեց նա:

Խոսելով դեպքի օրը տեղի ունեցած իրադարձությունների մասին` վկան հայտնեց, որ դեպքի վայրն իր տունն է համարվում` Չարբախում գտնվող «Լիա» գեղեցկության սրահին կից նկուղը: Պետրոսյանը հայտնեց, որ դեպքի օրը ինքը զանգահարել է Մուշեղին (խոսքը սպանված Մուշեղ Մուշեղյանի մասին է) և ասել. «Ի՞նչ ես մեջ ընգել»: Նրա խոսքով՝ Մուշեղը համաձայն չի եղել իր հետ և ագրեսիվ տոնով է խոսել: «Մուշեղն ընենց էր հետս խոսում՝ ոնց-որ ընկել էր հետևիցս: Ասում էր՝ ապե' ջան, լսո՞ւմ ես` քեզ ինչ եմ ասում»,- ասաց նա և հավելեց, որ այդ խոսակցությունից հետո որոշել էին հանդիպել ու պարզել` ինչն ինչոց է:

Վկան դժվարությամբ մտաբերեց՝ Մուշե՞ղն է իրեն առաջարկել հանդիպել, թե՞ ինքը: «Մուշեղն ինձ զանգեց, ասաց՝ արի Բանգլադեշի բասեյինների մոտ, տենանք իրար: Գեղամն ասաց` ըտենց մի գնա` մենակով, բա որ բռնեն, քեզ ծեծեն: Երկու ավտոյով գնացինք` մի քանի հոգով: Բասեյինների տեղը չգտանք, զանգեցի Մուշեղին, կանչեցինք Չարբախ: Ասեցինք` արի մեր տուն, տնավարի խոսանք»,-պատմեց նա:

Արամ Պետրոսյանի խոսքով՝ նկուղային հարկում եղել են 3-4 հոգով և սպասել Մուշեղին: «Մուշեղը ուժեղ խփեց դուռն ու մտավ ներս: Գևորը (սպանված Գևորգ Ավետիսյանը) ասաց` ո՞նց ես մտնում, էսի տուն ա, նա էլ, թե` ոնց ուզեմ, ըտենց էլ կմտնեմ ու Գևորին մայր հայհոյեց»,- պատմեց նա:

Վկայի խոսքով՝ Մուշեղը կրակել է Գևորգի ուղղությամբ, ինչից հետո իրար վրա են ընկել` փաթաթվել:

«Դեմս սիգարետ կար, շպրտեցի Մուշեղի վրա ու թևիս տակ ուժեղ ցավ զգացի, հետո գիտակցությունս կորցրեցի: Հիշում եմ, որ Գեղամը գոռում էր՝ օգնեք, Արամին խփել են: Հետո Գոռիկը՝ Գեղամի տղան, խփում էր ինձ որ ուշքս չգնա: Գոռն ու Անժելը՝ Գեղամի կինը, օգնեցին, տեղափոխեցին մեքենան»,- պատմեց նա:

Վկայի խոսքով՝ Մուշեղի անկանոն կրակոցի հետևանքով վնասվել են իր` կենսական նշանակության օրգանները: Վիրավորվելուց հետո 6 անգամ կորցրել է գիտակցությունը: «Ես համարյա մեռած եմ եղել: Հիվանդանոցում ընտանիքիս ասել են` եթե 3 օր մնա, կապրի, եթե` չէ, կմեռնի»,- ասաց նա և հիշեց, որ հիվանդանոցում աչքերը բացելուն պես տեսել է, որ կողքին պառկած է Մուշեղը, որի վրա ինչ-որ մեկը լացում էր:

Մեղադրողի այն դիտարկմանը, թե ինչո՞ւ է վկան նկարագրում միայն հանգուցյալների՝ սպանված Գևորգ Ավետիսյանի և Մուշեղ Մուշեղյանի գործողությունները, վկան պատասխանեց, որ միայն նրանց է տեսել:

Հարցին, թե ինչո՞ւ է միայն ինքը պատասխանել Մուշեղ Մուշողյանի գործողություններին` ծխախոտը նետել նրա վրա, վկան պատասխանեց. «Որովհետև մարդուն ուտում էր»:

Նշենք, որ նախաքննության ընթացքում Արամ Պետրոսյանը 3 անգամ ցուցմունք է տվել, և երեք անգամ դեպքի վայրում գտնված անձանց թվի վերաբերյալ իրարամերժ տվյալներ հայտնել: Առաջին ցուցմունքում նա հայտնել էր, որ դեպքի վայրում 15-20 հոգի է եղել, 2-րդ ցուցմունքում` որ այնտեղ 7-8 անձ է եղել, իսկ 3-րդ ցուցմունքում` որ այնտեղ 3-4 հոգի էին:

Այսօրվա նիստում վկան պարզաբանեց, որ առաջին ցուցմունքը տալու ժամանակ նոր էր դուրս եկել նարկոզից, հետևաբար` սխալ թիվ է ներկայացրել: Ուշագրավ է, որ դեպքի հաջորդ օրը, երբ Պետրոսյանն արդեն գիտակցության էր եկել, նա ցուցմունք էր տվել և հայտնել, որ, բացի Գևորգից, Մուշեղին այլ անձինք էլ են հարվածներ հասցրել, այսինքն` ծեծի ենթարկել: Ավելին` նա նկարագրել էր, թե ինչպես էր Մուշեղը վազում դեպի դուրս, իսկ Գևորգն ու անծանոթները հարվածում նրան:

Այսօրվա դատական նիստում վկան հերքեց նախկինում տված ցուցմունքը: Նա նախ հայտարարեց, որ ստել է, քանի որ վախեցել է, որ իրեն նույնպես կհամարեն միջադեպի մասնակից, ապա իր հակասական ցուցմունքները պատճառաբանեց նարկոզի տակ գտնվելու հանգամանքով:

Դատախազի հարցին, թե ո՞ւմ գործողությունների հետևանքով է նա տուժել, և ինչո՞ւ է զրկվել տուժողի կարգավիճակից, Պետրոսյանը պատասխանեց. «Մուշեղի գործողությունների հետևանքով եմ տուժել, դատախազությունն է ինձ զրկել տուժողի կարգավիճակից»:

Անդրադառնալով սպանությունների պատճառ դարձած գումարային հարցին` մեղադրող դատախազը հարցրեց, թե Գեղամն իրեն ուրիշի պարտքը հետ ստանալու իրավունք վերապահե՞լ էր: Վկան պատասխանեց, որ Ճվճվ Արոն հիվանդանոցում բուժվում էր և Գեղամին ասել էր, որ իրեն փող է պետք:

Դատախազի դիտարկմանը` Արա Վարդանյանի հարցը դարձել էր ձե՞ր հարցը, վկան խուսափողական պատասխան տվեց:

Հիշյալ հարցը դատախազը հնչեցրեց համեմատաբար բարձր տոնով: Դահլիճում ներկա քրեական հեղինակություն Նորատուսցի Արան՝ այս գործով ամբաստանյալ Ալիկ Բանդուրյանի եղբայրը, արձագանքելով դատախազի` բարձր տոնով հնչեցված հարցին, տեղից հայտարարեց. «Էս ո՞նց ես գոռում որ»:

Բարեբախտաբար կամ դժբախտաբար, ապակիներից այն կողմ գտնվող դատախազը չլսեց ամբաստանյալի եղբոր «նկատողությունը»:

Ամբաստանյալ Ալիկ Բանդուրյանի պաշտպան Երեմ Սարգսյանի այն հարցին, թե Մուշեղ Մուշեղյանն արդյո՞ք ապրում էր հանցավոր կյանքով, վկան պատասխանեց. «Հա, բա ոնց»:

Երբ մեղադրող դատախազները փորձեցին վկայից ճշտել, թե ո՞ր մարդիկ են ապրում հանցավոր կյանքով, դահլիճում ներկա քրեական հեղինակություն Նորատուսցի Արան դարձյալ ռեպլիկ արեց. «Լավ մարդիկ»:

Այսօրվա դատական նիստում հրապարակվեց նաև այս գործով տուժողի իրավահաջորդ` նոյեմբերի 13-ի սպանված Մուշեղ Մուշեղյանի կնոջ՝ Նարինե Հովհաննիսյանի նախաքննական ցուցմունքը: Հովհաննիսյանը դատարանին ուղղված իր գրությամբ հայտնել էր, որ չի ցանկանում ներկա լինել դատական նիստերին և ցանկանում է, որպեսզի հիմք ընդունեն իր նախաքննական ցուցմունքը:

Վկան նախաքննական մարմնին հայտնել էր, որ Մուշեղ Մուշեղյանի հետ ամուսնացել է 2000-ին, ունեն մեկ տղա: Նրա խոսքով՝ ինքն ու ամուսինը անհատ ձեռներեցներ են եղել` Գարեգին Նժդեհի անվան հրապարակի գետնանցումի տակ տաղավարներ են ունեցել: Վկան ասել էր, որ դեպքի նախորդ օրը ամուսինն առավոտյան տանից դուրս է եկել, ասել, որ ընկերների հետ է լինելու և այդ օրը տուն չի գալու: Հովհաննիսյանի խոսքով՝ Մուշեղը որևէ մեկի հետ խնդիր չուներ, իսկ թշնամիներ ուներ, թե` ոչ, տեղյակ չէ: Ըստ նրա` Մուշեղն ու Ալիկ Բանդուրյանը ժամանակին ընկերներ են եղել: Մուշեղը ծանոթ էր նաև Արա Վարդանյանին՝ Ճվճվ Արոյին,  ծանոթացել էին Ղրիմում: Նարինե Հովհաննիսյանը հայտնել էր, որ չի ճանաչում միջադեպի մասնակիցներից որևէ մեկին:

Այսօրվա դատական նիստին չէին ներկայացել նաև դատակոչված մյուս 3 վկաները: Դատարանը որոշում կայացրեց հերթական անգամ բերման ենթարկելու որոշումներ կայացնել Վիրաբ Գասպարյանի և Դավիթ Հախանումյանի նկատմամբ:

Թագուհի Մելքոնյան