Լավրովը նոյեմբերի 21-ին կայցելի Հայաստան

ՌԴ ԱԳՆ ղեկավար Սերգեյ Լավրովը Հայաստան կայցելի նոյեմբերի 21-ին: Այդ մասին ավանդական ճեպազրույցի ժամանակ հայտնել է ՌԴ ԱԳՆ պաշտոնական ներկայացուցիչ Մարիա Զախարովան:

Նա նշել է, որ նախատեսված է Լավրովի հանդիպումը ՀՀ ԱԳՆ ղեկավարի և ՀՀ նախագահի հետ: Այցը նվիրված է ռուս-հայկական դիվանագիտական հարաբերությունների հաստատման 25-ամյակին:

ՌԴ ԱԳՆ ներկայացուցչի խոսքերով՝ նախարարները կմասնակցեն Ռուսաստանի և Հայաստանի բարեկամությանը նվիրված ցուցահանդեսի բացմանը: 

Զախարովայի խոսքով` նախատեսվում է խորհրդատվությունների` 2018-2019 թվականների պլանի ստորագրում ՌԴ ԱԳՆ-ի և ՀՀ ԱԳՆ-ի միջև:

Ըստ ՌԴ ԱԳՆ ներկայացուցչի` երկկողմ բանակցությունների օրակարգը ներառում է երկու երկրների միջև համագործակցության լայն համալիրը, ՀԱՊԿ-ի, ԱՊՀ-ի գծով արտաքին քաղաքական փոխգործակցությանն առնչվող հարցերը, ՄԱԿ-ի, ԵԱՀԿ-ի, Եվրոպայի խորհրդի, Սևծովյան տնտեսական համագործակցության կազմակերպության և այլ միջազգային հարթակների շրջանակներում դիրքորոշումների համակարգումը:

Երկկողմ հարաբերություններից բացի, կողմերը կքննարկեն տարածաշրջանային անվտանգության հարցեր, այդ թվում` ԼՂ հակամարտության կարգավորման հեռանկարները:

Զախարովան հավելել է, որ նոյեմբերի 20-ին Լավրովը կայցելի Ադրբեջան: