Մի´ մռմռացեք. Տարոն Մարգարյանը՝ ի պաշտպանություն Թոխատյանի

Երևանի ավագանու այսօրվա նիստում որոշվեց Կանազի մշակութային պալատը 10 տարի ժամկետով տրամադրել ՀՀ ժողովրդական արտիստ Հրանտ Թոխատյանին: Նշենք, որ Թոխատյանը ցանկանում է այնտեղ թատրոն հիմնադրել:

Ավագանու՝ «Երկիր ծիրանի» խմբակցության անդամները դեմ քվեարկեցին նախագծին՝ նշելով, որ դա կոռուպցիոն ծրագիր է:

«Ելք» խմբակցության անդամ Արայիկ Հարությունյանն էլ նշեց, որ իրենց համար կարևոր է նման նախաձեռնությունը, սակայն նախագծի նկատմամբ որոշակի թերահավատություն կա, ինչը, ըստ նրա, Թոխատյանի քաղաքական դիրքորոշման հետ է կապված: «Իմ սերունդը մեծացել է «Խաթաբալլադա»-ով, մյուս սերունդը` «Մեա կուլպա»-ով, բայց ՀՀԿ-ի հետ Ձեր առնչությունները բացասական ֆոն են ստեղծում Ձեր նկատմամբ: Կարծում եմ, որ ՀՀԿ-ից հեռու մնալը Ձեր  գործունեության ընթացքում կարևոր է լինելու` նախագծի նկատմամբ վստահություն ունենալու առումով»,- ասաց Հարությունյանը:

Ի պատասխան` քաղաքապետ Տարոն Մարգարյանը նշեց, որ շատ ուրախ է, որ Թոխատյանն աշխատել է իրենց հետ ավագանիում, ու ուրախ է, որ նա հենց ՀՀԿ խմբակցության անդամ է եղել: «Մենք վստահում ենք Ձեզ, իսկ էն մարդիկ, ովքեր փորձում են Ձեզ քննադատել, թե ինչի համար եք ՀՀԿ-ի կողքին կանգնել, էդ մարդկանց հորդորում եմ քիչ-քիչ մի´ մռմռացեք»,- ասաց քաղաքապետը: