Երբ 10 հոգի էն մի կողմից կրակում են, դա դեռ ագրեսիա չէ. Վաղարշակ Հարությունյան

Վրաստանը, Ուկրաինան և այլ պետություններ ՆԱՏՕ-ի հետ համագործակցության այն մակարդակին են հասել, ինչ Հայաստանը: Այս մասին այսօր լրագրողներին ասաց ՀՀ պաշտպանության նախկին նախարար Վաղարշակ Հարությունյանը:

Նրա խոսքով՝ Հայաստանը ՆԱՏՕ-ի հետ ունի անհատական համագործակցության ծրագիր, սակայն ՆԱՏՕ-ն ո'չ Հայաստանին, ո'չ իր հետ համագործակցող Ուկրաինային և Ադրբեջանին անվտանգության որևէ երաշխիք չի տալիս: Հարությունյանը հիշեցրեց, որ փոխարենը Հայաստանը ռազմատեխնիկական համագործակցություն ունի Ռուսաստանի հետ և երաշխավորված պայմանագիր, որով ՀԱՊԿ-ը և Ռուսաստանն ագրեսիայի դեպքում պարտավոր են ապահովել մեր անվտանգությունը: «Մենք Ռուսաստանից տեխնիկա ենք ստանում, հազարավոր հայ սպաներ են անվճար պատրաստվում Ռուսաստանում»,- նշեց նա:

Yerkir.am-ի դիտարկմանը, թե Նախիջևանի կամ Տավուշի հետ սահմանին իրավիճակի հնարավոր սրման դեպքում վստահ կարո՞ղ ենք լինել, որ ՀԱՊԿ-ը մեզ համար անվտանգություն կապահովի, նախկին նախարարը պատասխանեց. «Իհարկե այո: ՀԱՊԿ-ի պայմանագրում գրված է, որ պատրաստ է միջամտել ագրեսիայի դեպքում, եթե հայկական կողմը դիմի: Իսկ երբ 10 հոգի էն մի կողմից կրակում են, դա դեռ ագրեսիա չէ: Օրինակ` եթե մի միջադեպ լինի, գուցե մենք համարենք, որ պետք չէ, օրինակ, Ռուսաստանի միջամտությունը և չենք դիմում նրան, ու դա մեր շահերից է բխում: Հնարավոր է նաև, որ, սառնասրտություն չցուցաբերելով կամ հույսն ուրիշի վրա դնելով, դիմենք, և այստեղ լայնածավալ տարածաշրջանային պատերազմ սկսվի: Դրա համար մենք ճշգրիտ հաշվարկ ունենք: Մինչ օրս եղած սահմանային միջադեպերը ցույց են տվել, որ մեր՝ մարտական ծառայություն իրականացնող ուժերը բավարար են` կանխելու այդ միջադեպերը»: