Կալանավորվել է փաստաբան Գայանե Գալոյանը

ՀՔԾ-ում գտնվող գործի շրջանակներում կալանավորվել է ՀՀ փաստաբանների պալատի անդամ Գայանե Գալոյանը: Այս տեղեկությունը Yerkir.am-ի հետ զրույցում հաստատեց ՀՀ Փաստաբանների պալատի մամուլի խոսնակ Ծովինար Խաչատրյանը: Փաստաբանը կալանավորվել է Հատուկ քննչական ծառայությունում քննվող` կաշառքի գործի շրջանակներում:

Գայանե Գալոյանը, շուրջ 20 տարի է, ինչ փաստաբան է աշխատում: Նա որպես պաշտպան է ներգրավված եղել բազմաթիվ հնչեղ քրեական գործերում, այդ թվում` Արմեն Տեր-Սահակյանի բանդայի գործում:

 2014-ին նա իրականացնում էր քրեական հեղինակություն Կայարանցի Թևոսիկի եղբոր՝ Արթուր Սաֆարյանի սպանության գործով կալանավորված Իսրայել Սարգսյանի պաշտպանությունը, սակայն հետո Սարգսյանի հարազատներն ինչ-ինչ պատճառներով հրաժարվեցին Գալոյանի ծառայություններից: