Վարդևան Գրիգորյանի որդու ինքնասպանության փաստով հարուցված քրեական գործը կասեցվել է

«Ծառուկյան» խմբակցության պատգամավոր Վարդեւան Գրիգորյանի որդու՝ Արշակ Գրիգորյանի ինքնասպանության դեպքի առթիվ հարուցված քրեական գործի վարույթը կասեցվել է` որպես մեղադրյալ ներգրավման ենթակա անձը հայտնի չլինելու հիմքով: Այս տեղեկությունը Yerkir.am-ի հետ զրույցում հաստատեցին ՀՀ քննչական կոմիտեից:

Հիշեցնենք, որ Արշակ Գրիգորյանի մարմինը գտել էին 2016թ. սեպտեմբերի 20-ին: Գյումրիի բժշկական կենտրոնից ահազանգ էր ստացվել, որ գլխի շրջանում հրազենային վնասվածքով իրենց մոտ է տեղափոխվել Ա. Գրիգորյանի դիակը։ Պարզվել էր, որ երիտասարդը հրազենային վնասվածքն ստացել է իրենց առանձնատան նկուղում արձակված կրակոցի արդյունքում։ Դեպքի վայրի զննությամբ հայտնաբերվել էին արյան հետքեր, «Մակարով» տեսակի ատրճանակ՝ լիցքավորված փամփուշտներով, 1 պարկուճ։ Հարուցվել էր քրեական գործ՝ ՀՀ քրեական օրենսգրքի 110-րդ հոդվածի 1-ին (ինքնասպանության հասցնելը) և 235-րդ հոդվածի 1-ին մասերով (զենք-զինամթերք պահելը)։