Աբովյանի քաղաքապետի պաշտոնանկության մասին լուրերը բամբասանք են․ քաղաքապետի մամուլի խոսնակ

Աբովյանի քաղաքապետի պաշտոնանկության մասին լուրը չի համապատասխանում իրականությանը, և այն սովորական բամբասանք է՝ Yerkir.am-ին ասաց Աբովյանի քաղաքապետի մամուլի խոսնակ Անի Կարապետյանը։ «Վահագն Գևորգյանը, երկրորդ անգամ վաստակելով ընտրողների վստահությունը և քվեն, չի պատրաստվում հրաժարական տալ»,- ավելացրեց նա։

Հիշեցնենք՝ մամուլում հրապարակումներ եղան, ըստ որոնց՝ Աբովյանի քաղաքապետ Վահագն Գևորգյանը հեռանում է քաղաքապետի պաշտոնից։ Նշվում էր նաև, որ Աբովյանում հանդիպել են քաղաքի ԲՀԿ-ական քաղաքապետ Վահագն Գևորգյանը և նրան հովանավորող` ԲՀԿ նախագահ Գագիկ Ծառուկյանը, որոնց միջև չափազանց լուրջ զրույց է կայացել Վահագնի հետագա քաղաքական կարիերայի վերաբերյալ: Ծառուկյանն իբրև թե նրան հորդորել է նախապատրաստել քաղաքապետի հրաժարականի դիմումը՝ դրանով ցանկանալով քաղաքն անցնցում հանձնել իշխող քաղաքական ուժին, իսկ Վահագն Գևորգյանին առաջարկվել է ստանձնել ԵԿՄ վարչության քարտուղարի պաշտոնը: