Երեք դատապարտում՝ երեք օրում. Թուրքիայի ԱԳՆ-ի թիրախում այս անգամ հայտնվեց Չեխիայի խորհրդարանը

Չեխիայի խորհրդարանի ստորին պալատը Հայոց ցեղասպանությունը ճանաչող բանաձև է ընդունել:

Թուրքիայի ԱԳ նախարարությունը «դատապարտող» հերթական հայտարարությունն է տարածել՝ հրաժարվելով ընդունել իրադարձությունները «ցեղասպանություն» որակելու՝ Չեխիայի խորհրդարանի որոշումը:

Նախարարության տարածած հայտարարության մեջ նշվել է նաև, որ այդ հարցով իրենց դիրքորոշման մասին Անկարայում Չեխիայի դեսպանատան միջոցով տեղեկացրել են այդ երկրի իշխանություններին:

Նշենք, որ ապրիլի 24-ից ի վեր Թուրքիայի ԱԳՆ-ն զբաղված է «խիստ դատապարտելով»: Երեք օրում նախարարությունը տարածել է երեք հայտարարություն՝ Երևանում և Հունաստանում Թուրքիայի դրոշն այրելու, նաև Չեխիայի խորհրդարանի կողմից Հայոց ցեղասպանության ճանաչման մասին:

Բացի այդ երեքից, ԱԳ նախարարությունը ևս մեկ հայտարարություն էր տարածել Հայոց ցեղասպանության 102-րդ տարելիցի կապակցությամբ ԱՄՆ նախագահ Թրամփի ուղերձի վերաբերյալ: