Թուրքիայում ձերբակալվել է իտալացի լրագրող Գաբրիել դել Գրանդեն

Թուրքիայում ձերբակալվել է 35-ամյա իտալացի լրագրող Գաբրիել դել Գրանդեն: Թուրքիայում լույս տեսնող հայկական «Ակօս» թերթի համաձայն՝ Գրանդեն ձերբակալվել է Հաթայում անվտանգության նկատառումներով ստուգումների ժամանակ, սակայն ձերբակալության պատճառները առայժմ հայտնի չեն:

Ըստ Ermenihaber-ի՝ իտալական մամուլում տեղ գտած լուրերի համաձայն՝ Իտալիայի պատկան մարմիններն ուշադիր հետևում են գործընթացին և ջանքեր գործադրում Գրանդեին ազատ արձակելու համար:

Հայտնի է, որ իտալացի լրագրողը Թուրքիա էր ժամանել մի քանի օր առաջ՝ Սիրիայի քաղաքացիական պատերազմի և «Իսլամական պետություն» ահաբեկչական խմբավորման ծագման մասին իր նոր գրքի համար որոշ նյութեր պատրաստելու: 
Ավելի վաղ Գաբրիել դել Գրանդեն ևս մի քանի անգամ այցելել էր Թուրքիա՝ նույն գրքի հետ կապված աշխատանքների շրջանակներում: Նա հայտնի է նաև Միջերկրական ծովով գաղթականների հոսքի թեմայով իր ուսումնասիրություններով, որոնք տարիներ շարունակ հրապարակվել են  Գրանդեի «Fortress Europe» խորագրով բլոգում: