Վարդան Ղուկասյանը քարոզարշավը գնահատեց «գեղեցիկ»

«Ծառուկյան» դաշինքի քարոզարշավի ավարտն ազդարարող միջոցառման մեկնարկից առաջ, դաշինքի անդամ, վարկանիշային թեկնածու, Գյումրիի նախկին քաղաքապետ Վարդան Ղուկասյանը լրագրողների հետ զրույցում քարոզարշավը գնահատեց «շատ նորմալ»: «Շատ նորմալ, գեղեցիկ, օրենքի սահմաններում... Շիրակում այդպես է»,- ասաց նա:

Ղուկասյանը ընտրողներին հորդորեց քվեարկել խղճի մտոք և ըստ արժանվույն գնահատելով մարդկանց արածը: Նրա խոսքով՝ քարոզարշավն անցնում է ազգանպաստ ձևով, բայց արդյունքների մասին խոսել չցանկացավ: «Կապրենք, կտեսնենք»,- ասաց թեկնածուն և հայտարարեց, որ կտրականապես դեմ է կեղծիքներին:

Ղուկասյանը, սովորության համաձայն, արեց նաև աստվածաշնչյան մեջբերումներ. «Ձայն բազմաց, ձայն Աստծո, երանի խաղասերներին, որոնք Աստծո զավակներ պիտի պաշտեն»,- ասաց նա:

Հարցին` ո՞վ շատ ձայն կհավաքի` ի՞նքը, թե՞ Վարդևան Գրիգորյանը, պատասխանեց. «Կապրենք, կտեսնենք: Հո ես Նոստրադամո՞ւսը չեմ»: