Վարդան Ղուկասյանը Գյումրիում ՛՛ստվերային քաղաքապետարան՛՛ է ստեղծել. ՛՛Ժամանակ՛՛

«Գյումրիի նախկին քաղաքապետ Վարդան Ղուկասյանը իր մտերիմներով ու նախկին աշխատողներով ստվերային քաղաքապետարանի նման ինչ-որ կառույց է ստեղծել, ժամանակ առ ժամանակ «նիստեր» ու «խորհրդակցություններ» է անցկացնում, ելույթներ ունենում եւ մասնակիցներին հանձնարարականներ տալիս: Այս մասին գրում է «Ժամանակ» թերթը եւ հավելում. «Ասենք՝ հանձնարարում է ստուգել Գյումրիում աղբահանության, փողոցների եւ քաղաքային այլ տնտեսությունների վիճակը, ապա վիճակի մասին զեկուցել իրեն: Այնուհետեւ արդյունքների մասին հայտարարություններ է անում, հեռուստաեթերով ելույթներ ունենում եւ այլն: Մի խոսքով, լուրջ «վերահսկողության» տակ է պահում Ս. Բալասանյանին»:

Թերթը փորձել է Վարդան Ղուկասյանից պարզել՝ ինչո՞ւ է նման գործընթաց սկսել եւ այդպիսով ի՞նչ նպատակ է հետապնդում՝ անտանելի՞ դարձնել Ս. Բալասանյանի աշխատանքը իրենից հետո Գյումրիում քաղաքապետ դառնալու համար, թե՞ պարզապես ցանկանում է նրա գործունեության վրա հասարակական վերահսկողություն սահմանել: Սակայն նախկին քաղաքապետը չի ցանկացել պատասխանել հարցերին: