Դաշնակցությունը երկրի և ժողովրդի շտապօգնությունն է. ՀՅԴ-ն Արարատի մարզում էր

Հայտնել ենք, որ այսօր ՀՅԴ-ն Արարատի մարզի Ղուկասավան, Նորամարգ, Այնթափ և Տափերական համայքներում հանդիպումներ է ունեցել ընտրողների հետ և նրանց ներկայացրել Դաշնակցության նախընտրական ծրագիրը:

Ընտրողներին իրենց խոսքն են ուղղել մարզի ՀՅԴ ռեյտինգային ընտրակարգով առաջադրված թեկնածուները:

Թեկնածու Արա Վարդանյանը ընտրողներին ուղղված խոսքում նշեց, որ նախընտրական օրեր են և ունենք 5 կուսակցություն, 4 դաշինք:  «Բոլորը իրենց գովում են, դարձել է «ջան գյուլում», պետք է համեմատենք՝ ում ենք ընտրում, որ կուսակցությունն է գործ արել»,- ասաց նա, ապա հավելեց. «Մենք չենք սիրում գոռալ-գոչել այս ենք արել, այն ենք արել, մենք գործի մարդ ենք»:

Ապա հորդորեց, որ ճիշտ ընտրություն կատարեն, որ սկսած փոփոխությունները շարունակվեն:

Թեկնածուներից Լենա Տոնապետյանը նշեց, որ իրենք սկսել են մեծ փոփոխություններ, ապա հավելեց, որ իրենք չեն ուզում գնված և աճուրդի հանված ձայներ: «Մենք ուզում ենք ձեր ձայներին լինենք արժանացած. անիմաստ է վաճառել ձեր ձայները 10-20 հազար դրամներով, եթե այդ 10-20 հազար դրամները բաժանենք 5 տարվա մեջ չնչին գումար կստացվի, ուստի պետք չէ գնալ նման քայլի»,- ընդգծեց նա, ապա հավելեց. «Այս ընտրությունները լինելու է նոր որակի ընտրություններ, ճիշտ կլինի ընտրությունից առաջ մի փոքր խորը մտածել, թե որ կուսակցությանը արժի ձայն տալ»:

Թեկնածուներից ուսուցչուհի Տաթևիկ Առաքելյանն էլ ասաց, թե  ՀՅԴ-ն ցանկանում է  կյանքի կոչել հստակ ծրագրեր ու ունի մեխանիզմներ դրանք իրականացնելու համար: «Նոր Սահմանադրությունը շատ կարևոր է, քանի որ այս նոր Սահմանադրությամբ երկրի կարևորագույն հարցերը ոչ թե լուծվելու է մեկ անձի իշխանության ներքո, այլ խորհրդարանի և խորհրդարանի կողմից ձևավորված կառավարության կողմից»,- ասաց նա և հորդորեց, որ վստահեն ՀՅԴ-ին:

Իսկ ահա թեկնածու Գնել Սարգսյանը նշեց, որ իրենք  ունեն  գիտակցված քվեի կարիք: «25 տարի շարունակ անկախությունից ի վեր գնացել եք ընտրության, կատարել եք ձեր ընտրությունը, տվել եք ձեր քվեն ուժերի ում ձեռքում 5 տարիների ընթացքում կրակն ենք ընկել: Ձեր գիտակցված քվեն տվեք Դաշնակցությանը, քանի որ Դաշնակցությունը մշտապես եղել է ժողովրդի կողքին, մշտապես եղել է  առաջնագծում: ՀՅԴ-ն ժողովրդի և երկրի շտապօգնությունն է»,- ասաց նա՝ դիմելով հավաքվածներին: