Ծառուկյանն ապարանցի կնոջն ուղարկեց Տիգրան Մուկուչյանի մոտ

Այսօր նախընտրական քարոզարշավի շրջանակներում «Ծառուկյան» դաշինքի ղեկավար Գագիկ Ծառուկյանն ապարանյան հանդիպման ավարտից հետո, մինչ մեքենային հասնելը, զրուցեց քաղաքացիների հետ: Մարդիկ իրենց ցանկություններն ու խնդրանքները՝ ուղղված նրան, նամակների տեսքով էին փոխանցում:

Ծառուկյանն իր մարտավարությունը փոխեց ԿԸՀ նախագահի զգուշացումից հետո: Հիշեցնենք, որ  ԿԸՀ նախագահ Տիգրան Մուկուչյանը հայտարարել է, որ «Ծառուկյան» դաշինքը զգուշացվել է դրամական ու նյութական խոստումներ տալու անթույլատրելիության համար։ Շարունակվելու դեպքում ԿԸՀ-ն ԸՕ-ով նախատեսված միջոցներ ձեռնարկելու իրավասություն կկիրառի։

Ապարանցի կանանցից մեկն իր երեխային օգնելու խնդրանքով դիմեց Ծառուկյանին, ով էլ կնոջը հորդորեց գնալ ԿԸՀ նախագահ Տիգրան Մուկուչյանի մոտ, ով իրեն արգելել է օգնություն բաժանել: «Հիմա էս կինը գնում ա Մուկուչյանի մոտ, երեխուն հետն ա տանում, ասում ա՝ պարո՛ն Մուկուչյան, ես էկել եմ, այ էս վիճակն ա, որ դու թույլ չես տալիս, որ Ծառուկյանն օգնի։ Ինքը թուղթը գրում ա՝ Ծառուկյա'ն, կարելի ա: Գալիս ես, անմիջապես հարցը լուծում եմ։ Հասկացա՞ր, թե՞ ոչ»,- ասաց Ծառուկյանը։

Իսկ մինչ այդ էլ Ծառուկյանը Մուկուչյանին դիմել էր նաև ամբիոնից՝ ասելով. «Պարո'ն, հարգելի' Մուկուչյան, հո ես չեմ տալի՞ս, որ ինձ ձայն տան»: