Հայաստանը ազգային դեղամատյան կունենա

Կառավարության վաղվա նիստի օրակարգումառողջապահության նախարարությունը ներառել է որոշում` սահմանել ազգային դեղամատյանը հրապարակելու կարգը:

Ըստ հիմնավորման,  «Ազգային դեղամատյանը հրապարակելու կարգը սահմանելու  մասին» կառավարության որոշման նախագծի ընդունումը պայմանավորված է «Դեղերի մասին» օրենքի պահանջների կատարմամբ:

2016 թվականի մայիսի 17-ին ընդունվեց «Դեղերի մասին» Հայաս­տանի Հանրապետության նոր օրենքը, որով ի թիվս այլ դրույթների, ամրագրվեց ազգային դեղամատյանը հրապարակելու կարգի սահմանման պահանջ:

 Ազգային դեղամատյանը, ըստ միջազգային չափանիշների, պարունակում է ժամանակակից, սպառիչ, լիարժեք, օբյեկտիվ, ապացույցների վրա հիմնված տեղեկատվություն յուրաքանչյուր դեղի հիմնական հատկությունների վերաբերյալ, ներառյալ` անատոմիական-բուժական-քիմիական ծածկագիրը, դեղի ակտիվ և օժանդակ նյութերի բաղադրակազմը, կիրառման ցուցումները, հակացուցումները, նախազգուշացումները, դեղաչափումը, այդ թվում` տարբեր տարիքային խմբերում և հատուկ խմբերի պացիենտների մոտ, կողմնակի ազդեցությունները, դեղի փոխազդեցություններն այլ դեղերի և սննդի հետ, կիրառումը հղիության և կրծքով  կերակրելու ժամանակաշրջանում, երեխաների ու ծերերի մոտ, ինչպես նաև դեղի պահման և ոչնչացման պայմանները:

Ազգային դեղամատյանը ապահովում է առողջապահության մասնագետների համար անհրաժեշտ տեղեկատվություն, անմիջականորեն նպաստում է դեղերի արդյունավետ կիրառմանը:  

Ազգային դեղամատյանը կդառնա դեղերի մասին տեղեկություններ ընդգրկող հիմնական  տեղեկատու: