Ինչո՞ւ ես շտապում. Սերժ Սարգսյանը՝ Աշոտյանին

Այսօր ՀՀԿ համագումարում պետք է ՀՀԿ նախագահ ընտրեին: Առաջարկություն ներկայացրեց ՀՀԿ համագումարի պատվիրակ, Երևանի քաղաքապետ Տարոն Մարգարյանը: Նա նշեց, որ, ՀՀԿ տարածքային կառույցներից ստացված առաջարկություններն ի մի բերելով և հաշվի առնելով ՀՀԿ-ականների վստահությունը ՀՀԿ նախագահ Սերժ Սարգսյանի հանդեպ, հաշվի առնելով ՀՀ նախագահի հարուստ քաղաքական փորձը, առաջարկում է նրա թեկնածությունը ՀՀԿ նախագահի պաշտոնում:

ՀՀԿ փոխնախագահ Արմեն Աշոտյանը հարցրեց. «Կա՞ն այլ առաջարկներ»: Ապա միանգամից շարունակեց. «Չկան այլ առաջարկներ, շնորհակալություն»:

Սերժ Սարգսյանը քմծիծաղ տվեց. «Ինչո՞ւ ես շտապում»:

Աշոտյանը պատասխանեց. «Դե, արդեն ասացին, որ չկան այլ առաջարկներ»:

Բաց քվեարկությամբ` Սերժ Սարգսյանը միաձայն վերընտրվեց ՀՀԿ նախագահ: Համագումարի հազարավոր մասնակիցներից գեթ մեկը դեմ կամ ձեռնպահ չէր:

Արմեն Աշոտյանը հուզված հայտարարեց, որ Սերժ Սարգսյանը վերընտրվեց ՀՀԿ նախագահ:

Համագումարի մասնակիցները հոտնկայս ծափահարեցին և ողջունեցին Սերժ Սարգսյանի ընտրությունը: