Սա պահպանողական և մակրոտնտեսական կայունության բյուջե է. Վահրամ Բաղդասարյան

2017 թվականի բյուջեի քննարկման ժամանակ ելույթ ունեցավ ՀՀԿ խմբակցության ղեկավար Վահրամ Բաղդասարյանը, որի խոսքով՝ ելույթների ժամանակ հնչեցին որակումներ, որոնցից ո'չ կառավարությունն է տեղյակ, ո'չ էլ մեծամասնությունը: ՀՀԿ-ականն ասաց՝ սա պահպանողական և մակրոտնտեսական կայունության բյուջե է, ապա ներկայացրեց մի քանի կետեր, որոնք հիմնավորում են իր ասածը:

Բաղդասարյանի խոսքով՝ 2014-15 թվականներին տեղի ունեցան երկու խոշոր բացասական զարգացումներ, որոնք ուղղակի ազդեցություն ունեցան մեր երկրի վրա: Խոսքը Ռուսաստանի Դաշնության նկատմամբ պատժամիջոցների կիրառման մասին է: Նա ընդգծեց, որ մեր տրասֆերտների մեծ մասը մուտք է գործում հենց ՌԴ-ից: Մյուս պատճառը, ըստ նրա, համաշխարհային շուկաներում հումքային ապրանքների գների նվազումն է, պղնձի միջազգային գների անկումը՝ այն պարագայում, երբ գաղտնիք չէ, որ մենք հումք արտահանող երկիր ենք:

«Եթե լինեն շեղումներ, ընդդիմության հետ կարժանանանք մեծամասնության քննադատությանը: Համոզված եմ՝ այս որդեգրված քաղաքականությունը կծառայի նպատակին, և միահամուռ ուժերով կհասնենք մեր նպատակին»,- ասաց Բաղդասարյանը` նշելով, որ ՀՀԿ-ն կողմ է քվեարկելու բյուջեի նախագծին:

ՀՀԿ խմբակցության ղեկավարը ընդդիմախոսներին հորդորեց նաև դրականը նկատել: