Ով ինձ ավելորդ անգամ վիրավորել ա, ես բոլորին ներում եմ. Արա Աբրահամյան

Այսօր Ռուսաստանի հայերի միության նախագահ Արա Աբրահամյանը լրագրողներին հայտնեց, որ իր քաղաքական ծրագրերը շարունակվում են:

Լրագրողներին հետաքրքրում էր Աբրահամյանի հայտարարություններից մեկը, թե ինքը «ամնիստիա» է կիրառելու մարդկանց նկատմամբ: Հարցին` մասնավորապես ինչի՞ մասին է խոսքը, նա պատասխանեց, որ խոսքը վերաբերում է այն մարդկանց, ովքեր վիրավորել են իրեն կամ իր ընտանիքի անդամներին: «Այստեղ մեկը մյուսի նկատմամբ շատ վատ են վերաբերվում, հարգանք չկա, ով ինձ ավելորդ անգամ վիրավորել ա, իմ ընտանիքի անդամներին վիրավորել ա, ես բոլորին ներում եմ»,- ասաց Արա Աբրահամյանը:

Ըստ նրա` երկրում խնդիրները շատ են, սակայն դրանք պետք է փորձեն լուծել համախմբված ուժերով: Աբրահամյանի համոզմամբ` անհրաժեշտ է  փոխել տնտեսության վիճակը, երկրի սոցիալական վիճակը, զարգացնել արդյունաբերությունը, ստեղծել աշխատատեղեր:

«Էկանամիչսկի բոլոր խնդիրներով մենք պետք է միասնականություն լինենք: Դա մի մարդու բան չի կամ միայն իշխանության համար չի, կամ` Սփյուռքի: Մենք պետք է թույլ չտանք, որ իրենք մահանաներ ունենան` ասելու, շատ մարդիկ ասում են` ասելու համար և իրար տարածում են: 90 տոկոսը չեն էլ եղել Հայաստան: Ես Սփյուռքում էի, 7 ամիս Ամերիկայում էի, ասում ա` գիտե՞ք այսպիսի բաներ: Ասում եմ` չէ, ես չգիտեմ: Ես հաճախ Երևան եմ լինում և հաճախակի հանդիպում եմ ՀՀ նախագահի հետ, չի եղել մի խնդիր, որ ես ասեմ, ինքը ասի` չէ»,- ասաց Արա Աբրահամյանը:

Հարցին, թե շարունակո՞ւմ է ֆինանսավորել «Հայկական վերածնունդ» կուսակցությանը, պատասխանեց. «Ես տենց բան չգիտեմ»: