Ինձ վիրավորել և ծանուցագիր են ուղարկել. Գագիկ Ծառուկյան

«Բարգավաճ Հայաստան» խմբակցության ղեկավար Գագիկ Ծառուկյանն այսօր խորհրդարանում լրագրողների հետ զրույցում, անդրադառնալով Քննչական կոմիտեից իրեն ուղարկված ծանուցագիրը պատռելու մասին հարցին, ասաց, որ իրեն վիրավորել ու ծանուցագիր են ուղարկել:

«Ում պետք ա, թող ուղարկեն, իրենց պարտականությունը կատարեն ու գործը բացահայտեն: Մենք ասել ենք մեր կարծիքը, որ եթե դա չբացահայտվեց, ուրեմն մեր կարծիքը հաստատվում է, որ դա սարքած, շինծու գործ է: Դրա համար իրենց պետք է համապատասխան իրենց մասնագիտական գործը կատարեն ու հարցը բացահայտեն»,– նշեց պատգամավորը:

Դիտարկմանը, որ եթե չներկայանա հարցաքննության, ըստ օրենքի, կարող են բերման ենթարկել իրեն, Ծառուկյանն արձագանքեց՝ իր իրավունքները լավ գիտի: «Մարդիկ թող մասնագիտորեն իրենց գործով զբաղվեն, դա Քենեդու սպանությունը չէր: Ամբողջ քաղաքը կա կամերաներ, ամբողջ ժողովուրդը խոսում է: Ես ասել եմ, եթե գործը չբացահայտվեց, ուրեմն իրավապահ մարմիններն իրենց տեղում չեն»,- ասաց նա:

Անդրադառնալով ԲՀԿ–ական պատգամավոր Էդուարդ Բաբայանի այն խոսքերին, թե  Աբովյանը չպետք է դառնա «գործ տվողների» քաղաք, ԲՀԿ խմբակցության ղեկավարն արձագանքեց`ոչ թե գործ տալու, այլ անհիմն հայտարարություններ անելու, բողոք գրելու մասին է խոսքը եղել:

Դառնալով Կոտայքի մարզպետ Ռոմանոս Պետրոսյանի այն հայտարարությանը, որ Աբովյանում քաղաքապետի ընտրություններում Վահագն Գևորգյանի հաղթանակը արժանապատիվ աբովյանցու պարտությունն էր, Ծառուկյանը նշեց. «Եթե որևիցե մեկը կարող է ժողովրդին ասել` անարժանապատիվ, ուրեմն ինքն է անարժանապատիվ, իրավունք չունի որևիցե մի քաղաքացու վիրավորելու, այլ հիմնական աբովյանցիները կատարել են իրենց պարտքը` անկախ նրանից` Գրիգորին են տվել, Վահագին են տվել, Մանուկին են տվել, Սասունին են տվել, մարդը կատարել է իր պարտականությունը, և նորից եմ ասում՝ աբովյանցիների ցավը տանեմ բոլորի»: