Ամբողջ օրը շնորհակալություն էիք հայտնում ընդդիմադիրներին, դե ասեիք՝ մեզ պետք չեք. Պողոսյանը՝ ՀՀԿ-ական պատգամավորին

«Ժառանգություն» խմբակցության պատգամավոր Թևան Պողոսյանի կարծիքով՝ իշխանության կազմում տեղի ունեցող փոփոխությունները լոկ անձերի մակարդակով են: «Հիմա սպասենք, թե երբ ծրագիրը կհրապարակվի, կհասկանանք` անձերի փոփոխություննե՞ր են, թե՞ համակարգային:  Իշխանափոխության անհրաժեշտություն կա»,- այսօր լրագրողներին ասաց նա:

Պատգամավորն անդրադարձավ նաև հանրապետության մի շարք համայնքներում տեղի ունեցած ՏԻՄ ընտրություններին: Նրա խոսքով՝ համայնքները, որտեղ ընտրվել են ոչ իշխանական ուժի ներկայացուցիչները, փոքր են, իսկ ավելի խոշոր համայնքներում պատկերը բոլորովին այլ է: «Այն համայնքներում, որտեղ տեղի ունեցան փոփոխություններ, փոքր համայնքներ էին, իսկ ավելի խոշոր համայնքներում, օրինակ՝ Գորիսում, այլ պատկեր է: Հասկանալի է, որ, մինչև մարզպետի փոփոխություն չլինի, ունենալու եք նույն իրավիճակը: Էջմիածնում, տեսանք,  պատմությունները կրկնվում են: Մեր երկրում Չիկագոյի պատմությունների կրկնությունն է»,- ասաց նա:

Պողոսյանի բնորոշմամբ՝ հոկտեմբերի 2-ին կայանալիք ՏԻՄ ընտրությունները  թեժ պայքարով են ընթանալու և «օգտագործվելու է ընտրախախտումների փաթեթ»:

Անդրադառնալով ՀՀԿ-ական պատգամավոր Լևոն Մարտիրոսյանի այն պնդմանը, թե Հայաստանում իշխանական ուժին այլընտրանք չկա, Թևան Պողոսյանը նշեց. «Ասել, որ ընդդիմությունն այս ու այն չունի, լավագույն արգումենտն է: Իսկ ապրիլյան պատերազմին հաջորդող օրերին ամբողջ օրը շնորհակալություն էին հայտնում ընդդիմադիրներին: Դե ասեիք` հելեք, գնացեք, մեզ պետք չեք: Հենց նեղն եք ընկնում, նոր եք ասում»: