Պարգևատրման արարողություն ԼՂՀ նախագահականում` անկախության 25-րդ տարեդարձի կապակցությամբ

Արցախի Հանրապետության Նախագահի նստավայրում սեպտեմբերի 15-ին տեղի է ունեցել պարգևատրման հանդիսավոր արարողություն՝ ԼՂՀ հռչակման 25-րդ տարեդարձի կապակցությամբ:

Ինչպես հայտնում են Արցախի Հանրապետության նախագահի տեղեկատվության գլխավոր վարչությունից, նախագահ Սահակյանը շնորհավորել է բոլոր պարգևատրվածներին՝ նշելով, որ հոբելյանական այս տարում տեղի կունենան պարգևատրման մի քանի հանդիսավոր արարողություններ:

Երկրի ղեկավարն ընդգծել է, որ անկախ, հզոր ու ինքնիշխան պետությունը բացառիկ արժեք է և մեր ժողովրդի անվտանգության ապահովման, նրա հարատևման ամենահուսալի գրավականը: «Համոզված եմ, որ մենք կունենանք նորանոր հաջողություններ և ձեռքբերումներ: Համոզված եմ, որովհետև մեր ժողովուրդն ունի անսասան ոգի, անկոտրում կամք, մեծ աշխատասիրություն ու լավատեսություն, որոնք դրսևորվում են և՛ մարտի դաշտում, և՛ խաղաղ պայմաններում»,- նշել է Բակո Սահակյանը:

Միջոցառմանը ներկա էին Հայ Առաքելական Եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ԼՂՀ ԱԺ նախագահ Աշոտ Ղուլյանը, վարչապետ Արայիկ Հարությունյանը, պաշտոնատար այլ անձինք: