Հայաստանում ծնունդների բնականոն համարվող սեռային հարաբերակցության շեղումները վտանգավոր սահմանագծի են հասել

Հայաստանում տարեկան 1400 աղջիկ չի ծնվում սեռով պայմանավորված հղիության արհեստական ընդհատումների պատճառով: Եթե այսպես շարունակվի, ապա մինչև 2060 թվականը Հայաստանը կկորցնի մոտ 93 հազար աղջիկ` ապագա մայր:  Այս մասին «Երիտասարդ բժիշկների հայկական ասոցիացիա»-ի կողմից կազմակերպված «Պպտղի սեռով պայմանավորված հղիության արհեստական ընդհատումները, դրանցով պայմանավորված ժողովրդագրական իրավիճակը, խնդիրները և հնարավոր լուծումները» սեմինար-քննարկումնից առաջ լրագրողների հետ զրույցում ասաց հանրային առողջապահության մասնագետ, «Երիտասարդ բժիշկների հայկական ասոցիացիա»-ի գիտահետազոտական ծրագրերի իրականացման գրասենյակի ղեկավար Ինեսա Չիլինգարյանը: «Պատճառները շատ են, որ կանայք ընդհատում են հղիությունը, երբ իմանում են աղջիկ են ունենալու: Կարծում են, որ տղաներն ընտանիքի պաշտպաններն են, ընտանիքի հաց վաստակողներն են, ապագա զինվորներ են: Սակայն, ապագա զինվոր ասելով չեն մտածում, որ եթե այդ աղջիկները չծնվեն, հետագայում արդեն զինվորներ էլ չեն ծնվի»,- ասաց նա:

Չիլինգարյանի խոսքով՝  գինեկոլոգները, ովքեր սերտ շփում են ունենում հղի կանանց հետ, կարող են աշխատել, համոզել, բացատրել, թե ինչու չի կարելի, պտղի սեռով պայմանավորված, հղիությունը ընդհատել: «Հենց նրանք են առաջինը շփվում այն կանանց հետ, ովքեր ուզում են սեռով պայմանավորված ընդհատել հղիությունը:  Բժշիկները պետք է ամեն կերպ համոզեն կնոջը, ով այդ քայլին է գնում, քանի որ ընտանիքն է ստիպում: Բժիշկները պետք է ներկայացնեն, թե  նման քայլն ինչ բացասական ազդեցություններ կարող է ունենալ իրենց առողջության վրա»,- նշեց նա՝ հավելելով, որ օրինակ, Չինաստանում, որը պտղի սեռով պայմանավորված հղիության ընդհատումների  ցուցանիշով առաջինն է աշխարհում, միջին ցուցանիշը կազմում է՝ 118 տղա 100 աղջկա դիմաց, Հայաստանում կան մարզեր, որտեղ ցուցանիշը կազմում է 124 տղա-100 աղջիկ, Երևանում՝ 115 տղա-100 աղջիկ: Ամենացածր ցուցանիշը Սյունիքի մարզում է: Ըստ Չիլինգարյանի՝ հետազոտությունները ցույց են տալիս, որ գյուղական համայնքներում ցուցանիշներն անհամեմատ բարձր են, քան քաղաքային համայնքներում:

Չիլիգարյանը նաև նշեց, որ այս տվյալները մտահոգիչ են և ծնունդների բնականոն համարվող սեռային հարաբերակցության շեղումները ներկայում Հայաստանում վտանգավոր սահմանագծի են հասել և դարձել լուրջ ժողովրդագրական սպառնալիք: