Տնտեսական հաջողությունները, ցավոք, չեն ազդել բարեկեցության բարելավման վրա. Հովիկ Աբրահամյան

Այսօր կառավարության նիստի օրակարգի քննարկումից առաջ վարչապետ Հովիկ Աբրահամյանը խոսեց 2016թ. առաջին կիսամյակի տնտեսական ցուցանիշների մասին: Նա նշեց, որ, հիմնվելով 2016 թվականի առաջին կիսամյակի տվյալների վրա, կարելի է փաստել, որ առկա են որոշակի հաջողություններ, անգամ` շարունակվող գնանկման համատեքստում 2016 թվականի առաջին եռամսյակում գրանցվեց 4.4 տոկոս տնտեսական աճ, իսկ հունվար-հունիս ժամանակաշրջանում տնտեսական ակտիվության ցուցանիշը, նախորդ տարվա նույն ժամանակաշրջանի նկատմամբ, աճեց 4.8 տոկոսով: 2015 թվականին Հայաստանի Հանրապետության կառավարության կողմից իրականացված հակացիկլային քաղաքականության և առաջ եկող խոչընդոտներին ժամանակին և արդյունավետ արձագանքման շնորհիվ այդ տարվա բացասական շոկերն ամբողջապես կլանվեցին մեր տնտեսության կողմից՝ չփոխանցվելով 2016 թվական: Ըստ փորձագիտական գնահատականների` 2015 թվականին տեղ գտած արտաքին ցնցումները, առանց կառավարության կողմից իրագործված քաղաքականության, կարող էին բնակչության եկամուտները նվազեցնել 20-30 տոկոսով:

Վարչապետի խոսքով՝ արդեն իսկ տեսանելի են կառավարության՝ արտահանման խթանմանն ուղղված քաղաքականության առաջին արդյունքները: Եվ կառավարության նպատակն է եղել խթանել տնտեսական աճն արտահանման աճի շնորհիվ՝ զուգակցելով այն արտաքին առևտրի հաշվեկշռի պակասուրդի կրճատմամբ: Արտաքին առևտրաշրջանառության աշխուժացման արդյունք է արդյունաբերական արտադրանքի ծավալների աճը:

Միաժամանակ, վարչապետը նշեց, որ տնտեսության մեջ առկա խնդիրներն ու մարտահրավերները շատ են, դեռ անելիքներ կան, և նշված տնտեսական հաջողությունները չեն ազդել բարեկեցության բարելավման վրա, ուստի կառավարությունը պետք է գործադրի ջանքեր կյանքի բարելավման ցուցանիշները բարելավելու ուղղությամբ:

«Փոփոխություններն իրողություն դարձնելու համար ուշադրության կենտրոնում պետք է պահենք բոլոր այդ մարտահրավերները: Հանձնարարում եմ բոլոր նախարարություններին` կիսամյակի վերջում հանրությանը ներկայացնել ոչ միայն ձեռքբերումները, այլև կոնկրետ նախաձեռնությունները, կոնկրետ ծրագրերը` ներգրավելով դրանցում հանրությանը: Միայն թափանցիկ մասնակցությունն է, որը թույլ կտա բարձրացնել տնտեսության մրցունակությունն ու կենսունակությունը»,- ասաց վարչապետը: