«Երջանիկ է նա, ով հայ է». Թուրքիան փոխել է ժողովրդավար ձևանալու իր ուղին

«Երջանիկ է նա, ով թուրք է». այս խոսքի հեղինակն է Թուրքիայի Հանրապետության հիմնադիր, երկրի առաջին նախագահ Քեմալ Աթաթուրքը: Այս խոսքով են մարզումների ժամանակ «ոգեշնչվում» Թուրքիայի բանակի զինվորները: Թուրքիայում մինչ այդ չի եղել մեկը, ով երբևէ հանդգնել է «թուրք» բառը փոխարինել մեկ այլ ազգության հետ:

Ուշագրավ է, սակայն, որ հուլիսի 15-ին Թուրքիայում ռազմական հեղաշրջման փորձից հետո Թուրքիայի՝ ամեն առիթի ժողովրդավար ձևանալու փորձ անող իշխանությունները փոխում են այդ ուղղությամբ իրենց ուղին:

Պատրաստվել է հեղաշրջման վերաբերյալ թեմատիկ հոլովակ, որտեղ Աթաթուրքի հայտնի «երջանիկ է նա, ով թուրք է» խոսքերը տարածվել են Թուրքիայում բնակվող ժողովուրդների՝ հայերի, հույների, լազերի, քրդերի, զազաների, վրացիների, չերքեզների, արաբների, ալբանացիների, հրեաների, քրիստոնյաների, մուսուլմանների, ալևիների և սուննիների վրա:

«Քանի որ մենք, մեր կյանքն ու արյունը զոհաբերելով, միասնաբար հաղթել ենք «ազատագրական» պատերազմը, ժողովրդավարության պատերազմը նույնպես ձեռք ձեռքի տված ենք հաղթելու»,-մասնավորապես ասվում է տեսահոլովակում:

Նշենք նաև , որ տեսահոլովակն առաջինը տարածել է  պետական շրջանակների կողմից հովանավորվող TGRT հեռուստաընկերությունը: