Միայն ժողովրդավար Թուրքիան կարող է կապ ունենալ Հայաստանի հետ. Փայլանը հանդիպեց ԵՊՀ ուսանողներին

Թուրքիայի խորհրդարանի հայ պատգամավոր Կարո Փայլանն այսօր հանդիպեց ԵՊՀ ուսանողների հետ, պատասխանել նրանց հարցերին:

«Հայաստանում երիտասարդներին տեսնելով՝ ես սկսում եմ այլ կերպ մտածել Հայաստանի ապագայի մասին,- ասաց նա:- «Շատ ուրախ եմ Հայաստանում գտնվելու և Երևանի պետական համալսարանում ձեզ հետ հանդիպելու համար: Որպես պատգամավոր՝ առաջին անգամ եմ Հայաստանում և ուրախ եմ, որ այս անգամ ավելի ուժեղ Հայաստան եմ տեսնում: Թուրքիայում, դժբախտաբար պայմաններն ավելի վատ են և ամեն օր ավելի են վատանում»:

Փայլանը նշեց, որ Թուրքիայի և Հայաստանի սահմանը 25 տարի է` փակ է, և այդպես էլ կշարունակվի, քանի դեռ Թուրքիան ղեկավարում են ազգայնականները: Նա ընդգծեց, որ սահմադրական փոփոխությունից հետ Էրդողանը դիկտատոր դարձավ և դաշինք կազմեց ազգայնական կուսակցության հետ: «Հիմա էլ Թուրքիան ազգայնականության ճանապարհին է: Մեր կուսակցությունն իր թեկնածուն կունենա 2019 թվականին, որպեսզի այս ճամփան չշարունակվի և վերջանա»,- նշեց Փայլանը, ապա ավելացրեց, որ միայն ժողովրդավար Թուրքիան կարող է կապ ունենալ Հայաստանի հետ:

Հայերը Թուրքիայում ազգային փոքրամասնություն են: «Ընդամենը 60 000 հայ կա Թուրքիայում: Իհարկե, մահմեդականացված հայեր կան, բայց մշակույթը փոխում է ամեն ինչ: Ճանապարհ պետք է գտնենք, որ նորից արդարության և խաղաղության մեջ միասնաբար ապրենք՝ հայ, թուրք, քուրդ: Ես հասկանում եմ, որ սա դեռ երազ է և այդքան էլ մոտ ապագայում չի լինելու»,- ասաց Փայլանը:

Անդրադառնալով մայրենի լեզվի` իր իմացությանը, նա նշեց, որ տատիկները գերազանց են իմացել հայերեն, սակայն ծնողները՝ ոչ, իսկ ինքը հայերեն առաջին տառերին ծանոթացել է մանկապարտեզում:

Ուսանողների հետ հարցուպատասխանից հետո Կարո Փայլանը Երևանի պետական համալսարանի կողմից պարգևատրվեց Ոսկե մեդալով և Շմավոն Շմավոնյանի «Արարատ» ալբոմով: 

«Շնորհակալ եմ ու հպարտ եմ»,- ասաց Փայլանը: