Ապրիլը 180 աստիճանով փոխեց մեր ծրագրերը. Թումանյանի թանգարանն այսօր դրամահավաք կանի

Այս տարի «Թանգարանների գիշեր» միջոցառումը Հայաստանում անցկացվում է այսօր: Այն իրականացվում է մշակութային ժառանգության պահպանության բնագավառում ամենահին միջազգային կազմակերպություններից մեկի` Թանգարանների  միջազգային  խորհրդի  /ԻԿՕՄ/ առաջարկով:

Այսօր թանգարանները կգործեն անվճար` այցելուներին առաջարկելով յուրահատուկ ծրագրեր:

Yerkir.am-ի հետ զրույցում Հովհ. Թումանյանի տուն-թանգարանի տնօրեն Նարինե Թուխիկյանը նշեց, որ ամեն տարի թանգարանը շատ ուրախ է անցկացրել այս օրերը, շատ բուռն ու բազմազան, բայց այս տարի, ընդհակառակը, շատ զուսպ են լինելու:

«Մեր օրակարգը հընթացս փոխել ենք. ապրիլը 180 աստիճանով փոխեց մեր այս տարվա ծրագրերը, հատկապես` նրանք, որոնք մենք անում էինք արտաբյուջետային միջոցների հաշվին: Մեր միտքն ուղղված է միայն մեկ ուղղությամբ` մենք մի փոքրիկ հանգանակության տուփ են դրել թանգարանի մուտքի մոտ և առաջարկելու ենք բոլորին` իրենց ազգային տուրքը մատուցել բանակին: Հավաքված գումարը կփոխանցվի վիրավոր զինծառայողներից մեկին»,- ասաց Թուխիկյանը:

Նա հիշեց նաև, որ ժամանակին Անդրանիկ Օզանյանը, երբ դիմել էր ժողովրդին, իր խոսքում նշել էր, թե այն մարդիկ, ովքեր բանակին զինվոր կտան, մյուսները պարտավոր են այդ ընտանիքին պահել: Թուխիկյանի հավաստմամբ` իրենք էլ դրամահավաքի միջոցով իրենց տուրքն են մատուցելու հերոս զինվորներից մեկին, որի շնորհիվ ենք մենք այսօր ողջ: 

Ի դեպ, Թումանյանի, ինչպես նաև այլ թանգարանների` «Թանգարանային գիշեր» միջոցառման առիթով նախատեսված ծրագրերին կարող եք ծանոթանալ այստեղ: