Հայկական կողմն ադրբեջանցի ողջ ռազմագերի չունի

Հայկական կողմն ադրբեջանցի ողջ ռազմագերի չունի, ոչ մեկին գերի մեջ չի վերցրել, իսկ թե ադրբեջանական կողմում կա՞ն ողջ ռազմագերիներ, հայտնի չէ. այսօր լրագրողների հետ հանդպման ժամանակ, ի պատասխան Yerkir.am-ի հարցին, ասաց «Ընդդեմ իրավական կամայականությունների» ՀԿ-ի նախագահ, Գերիների, պատանդների և անհայտ կորածների հանձնաժողովի անդամ Լարիսա Ալավերդյանը:

Նա հավաստիացրեց, որ հայկական կողմը բարձր մակարդակով աշխատանքներ է տանում անհայտ կորածների վերաբերյալ տեղեկություններ ստանալու և նրանց վերադարձնելու ուղղությամբ: Ալավերդյանը նշեց, որ հայկական կողմը համագործակցում է Կարմիր խաչի հետ:

«Ադրբեջանը նույնպես շահագրգռված պետք է լինի, քանի որ մեզ մոտ շատ դիակներ ունեն: Հայկական կողմը շատ օպերատիվ, իրեն հասանելի հատվածնորում հավաքել է ադրբեջանական զոհերի մարմինները, և դրանք պահում է միջազգային նորմերով նախատեսված պայմաններում: Հայկական կողմը երբևիցե ադրբեջանական կողմի դիակների նկատմամբ որևէ գործողություն չի կատարել, ինչը չի կարելի ասել ադրբեջանական կողմի մասին, որը ահաբեկչական խմբավորման օրինակով է վարվել դիակների և զինծառայողների հետ»,- ասաց նա` նշելով, որ դիակները հանձնելիս Կարմիր խաչը կֆիքսի` ինչ վիճակում են դրանք տեղափոխում, սակայն դա չի կարող պատնեշ լինել, որպեսզի ադրբեջանական կողմը ստահոդ լուրեր տարածի:

Անդրադառնալով այն հարցին, թե հնարավո՞ր է` երկու կողմերը փոխանակեն դիերը, Ալավերդյանը պատասխանեց. «Հայկական կողմը միշտ խուսափել է «փոխանակում» բառից, մենք խոսում ենք վերադարձի մասին և աշխատանքներ ենք տանում դիերը վերադարձնելու ուղղությամբ»:

ՀՀ առաջին ՄԻՊ-ը նաև հորդորեց լրատվամիջոցներին՝ անհայտ կորածների վերաբերյալ նյութեր հրապարակելիս ավելի նրբանկատ լինել: