Բարերարությունը եկեղեցի կառուցելը չէ. Բարսեղ Բեգլարյան

Այսօր Սուրբ Աննա եկեղեցում հոգեհանգստյան կարգ մատուցվեց մեծ բարերար, գործարար Ալեքսանդր Մանթաշյանցի հիշատակին։ Այնուհետև բարերարի ծննդյան օրվա առիթով մի քանի գործարարներ պսակներ  ու ծաղիկներ դրեցին եկեղեցու հարևանությամբ գտնվող` Մանթաշյանցի արձանի մոտ:

Նշենք նաև, որ Հայաստանի արդյունաբերողների և գործարարների միության նախագահությունը և գործարարները դիմել են ՀՀ կառավարությանը, որպեսզի մարտի 3–ը պաշտոնապես ճանաչվի որպես Գործարարության օր:

Գործարար Բարսեղ Բեգլարյանը (Ֆլեշի Բարսեղ) լրագրողների հետ զրուցում ընդգծեց, որ Ալեքսանդր Մանթաշյանցը հզոր հայերից մեկն է, խոշոր գործարար և բարերար: «Ինձ համար այս օրը յուրահատուկ օր է, և մենք պարտավոր ենք հարգանքի տուրք մատուցել մեր խոշոր բարերարին և կարողանալ մեր հասարակությանը ցույց տալ, որ հայ գործարարը պետք է ունենա իր օրինակը, ինչպիսին Մանթաշյանցն է եղել: Հայ գործարարը Հայաստանում միանշանակ չի ընկալվում,  գործարարները ներկայացվում են որպես գռփող, թալանող, գողացող, ավազակ: Սակայն իսկական գործարարի գործը ո՞րն է, իրականում հայտնի պետք է լինի Աստծոն  ու գործարարին` անձամբ: Ինչքան հարուստ, լավ ու ճիշտ գործարարներ ունենանք, Հայաստանն ավելի հզոր կլնի»,- ասաց նա:

Yerkir.am-ի հարցին, թե  մեր իրականությունում կա՞ն այդպիսի գործարարներ, և կարո՞ղ է նշել մի քանիսին կամ մեկի անունը տալ, Բեգլարյանը պատասխանեց. «Ես կարծում եմ` կարիք չկա նշելու, որովհետև խտրականություն կլինի: Լավ գիտեք, որ խոշոր գործարարներ կան Հայաստանից դուրս, ինչու չէ` նաև Հայաստանում: Ես կարծում եմ, որ գործարարները բարեգործությունը կատարելիս չպետք է դա մատի փաթաթան դարձնեն, բարերարությունը եկեղեցի կառուցելով չէ: Աստվածաշնչում ասվում է` աջ ձեռքը չպետք է իմանա ձախ ձեռքը ինչ է անում, և աջ աչքը չպետք է տեսնի, թե ձախ աչքը ինչ է տեսնում: Իրականում կան այսպիսինները»:

Նրա խոսքով`գործարարը պետք է նախևառաջ ստեղծի  աշխատատեղեր, պետք է բարեխիղճ հարկատու լինի, նաև` իսկական գործածարը պետք է իր երկրում գործարարություն անի և իր ունեցած հարստությունը ներդնի Հայաստանում:

Բեգլարյանը նշեց նաև, որ Հայաստանում միջին խավ ձևավորված չէ, որը մեր հարցերի հարցն է:  «Եթե մենք չունենք միջին խավ, զարգացման ճանապարհը դանդաղ ենք անցնելու»,- ասաց նա: