Վա՜յ, էն նկարների միջի ժամացույցը. սահմանամերձ համայնքներից 150 երեխա էր այցելել Երևան

Այսօր Առնո Բաբաջանյանի անվան համերգասրահում սահմանապահ գյուղերից շուրջ 150 երեխա էր հյուրընկալվել: Նրանք Երևան էին եկել «Մշակութային կրթօջախներ-դպրոց» պետական ծրագրի շրջանակներում:

Մինչ այդ երեխաներն արդեն հասցրել էին լինել Թումանյանի տուն-թանգարանում, Ազգային պատկերասրահում, Կոմիտասի թանգարանում:

Հայաստանի պետական ֆիլհարմոնիայի տնօրեն Գագիկ Մանասյանը yerkir.am-ի հետ զրույցում նշեց, որ սա առաջին դեպքը չէ, երբ երեխաներն այցելում են Երևանի մշակութային կենտրոններ: «Մենք շատ լավ գիտենք, որ այսօր սոցիալական խնդրի պատճառով շատերը չեն կարողանում Երևան գալ ու ինչ-ինչ մշակութային միջոցառումների մասնակցել: Ծրագրի մեջ ընդգրկված են սահմանապահ գյուղեր, որոնք ոչ միշտ հնարավորություն և ժամանակ ունեն այցելելու մշակութային միջոցառումների: Ծրագիրը գիտաճանաչողական է: Նրանք իրենց դասերի ընթացքում տեսական գիտելիքներ են ձեռք բերում, բայց, գալով Երևան, նրանց տեսական գիտելիքներն ավելի առարկայական են դառնում: Նրանք տեսնում են` ինչպես են կառուցված թատերական ներկայացումները, ծանոթանում են երաժշտական գործիքներին»,- ասաց նա:

Մանասյանը նշեց նաև, որ երեխաների մեծ մասն առաջին անգամ է լինում Երևանում: «Երեխաներից մեկը, ուշադիր զննելով Հանրապետության հրապարակը, բացականչեց` վա՜յ, էն նկարների միջի ժամացույցը: Մեզ համար այդ ուրախությունը, ժպտացող աչքերը տեսնելն ամեն ինչ է»,- ասաց մեր զրուցակիցը:

Վայոց ձորի Ելփին համայնքի միջնակարգ դպրոցի «Հանրահաշիվ, երկրաչափություն» և «Տեխնոլոգիա» առարկաների ուսուցիչ Կարեն Խուդոյանն էլ  նշեց, որ այսօր Երևան եկած երեխաների 90 տոկոսն առաջին անգամ էր այցելում Երևան: Երեխաները, ըստ նրա, ամենից շատ ազդվել էին Ազգային պատկերասրահ այցից:

«Մի բան է դասի ժամանակ մեր պատմության մասին սովորելը, մեկ այլ բան` տեղում ցուցանմուշները նայելը: Մարզում երեխաների հետ անպայման այցելում ենք մշակութային օջախներ, և նման ձևաչափ ընտրելը շատ ճիշտ էր: Երեխաներին նաև շատ ուրիշ հարցեր էին հետաքրքրում, որովհետև առաջին անգամ են այցելում Երևան, բնական է: Հուսանք` ծրագիրը շարունակական բնույթ կկրի»,- ասաց Խուդոյանը:

Նա նշեց նաև, որ մարզում երեխաներին «Տեխնոլոգիա» առարկան դասավանդելիս ուրիշ մոտեցում են ցուցաբերում` սովորեցնելով այն, ինչ հետագայում պետք է գալու հենց մարզում ապրող երեխային: «Սովորեցնում ենք այն, ինչ հետագայում գյուղատնտեսական աշխատանքների ժամանակ անհրաժեշտ է»,- ասաց ուսուցիչը:

Հ.Գ. Երեխաների հետ, ցավոք, չկարողացանք զրուցել, քանի որ երեխաները շտապում էին` մարզերում սկսել էր ձյուն գալ: