Մենք` հայերս, Եվրոպայում նոր իրավունք ենք ստացել. Արա Ղազարյան

«Փերինչեքն ընդդեմ Շվեյցարիայի» գործով որպես 3-րդ կողմ ներգրավված Հայաստանից Եվրադատարանը կոնկրետ պահանջներ ուներ, Հայաստանն էլ իր հերթին էր շահագրգռված. այսօր «Մեդիա կենտրոն»-ում քննարկման ժամանակ ասաց ՀՀ արդարադատության նախարարի տեղակալ Արման Թաթոյանը:

Փոխնախարարը հիշեցրեց, որ այս գործով ՀՀ-ն ներգրավվեց որպես երրորդ կողմ, քանի որ Եվրադատարանի ստորին պալատի վճռում առկա էին ձևակերպումներ, որոնք ընդունելի չէին Հայաստանի  համար` դրանք կասկածի տակ էին դնում Հայոց ցեղասպանության հետ կապված պատմական հետազոտությունները,  ընկալումները և այլն: «Հայաստանը խնդիր ուներ և հասավ իր ներկայացրած պահանջների կատարմանը»,- ասաց Թաթոյանը և թվեց Հայաստանի համար կարևոր նշանակություն ունեցող այն դրույթները, որոնք ՄԻԵԴ մեծ պալատի վճռով սահմանվել էին:

«Առաջին հերթին կարևոր նշանակություն ունի այն,  որ վճռում Եվրոպական դատարանն ասում է, որ իրավասու չէ և չի միջամտելու միջազգային իրավունքում ցեղասպանության հարցի քննարկմանը:  Այս հարցը ստորին պալատի վճռում չափազանց թույլ էր արտահայտված. ՄԻԵԴ-ն այն քննարկել էր ներպետական իրավունքի տեսանկյունից: ՄԻԵԴ-ն առաջին անգամ տվեց այն ձևակերպումը, որ հայերն ունեն իրենց նախնիների հանդեպ հարգանքի իրավունք, որ Ցեղասպանության զոհերի, նրանց ընտանիքների արժանապատվությունը պաշտպանելու իրավունքը ենթակա է պաշտպանության Եվրոպական կոնվենցիայով: Եթե սա համեմատում ենք Թուրքիային վերաբերող մյուս վճիռների հետ, ապա այն կարևոր նշանակություն ունի»,- ասաց Թաթոյանը:

Միջազգային իրավունքի մասնագետ Արա Ղազարյանն էլ, իր հերթին, շեշտելով  հիշյալ դրույթների կարևորությունը, օրինակ բերեց, որ եթե ինչ-որ անձնավորություն Եվրախորհրդի կազմի մեջ գտնվող պետություններից որևէ մեկում հայհոյի Հայոց ցեղասպանությունը, յուրաքանչյուր հայ կարող է պահանջատեր լինել: «Սա նոր իրավունք է, որը մենք՝  հայերս, ստացանք Եվրոպայում»,- ասաց նա: