Սահմանադրությունը պետք է ներողություն խնդրի ձեզանից. Փաշինյանը՝ կառավարությանը

Այսօր կառավարության հետ հարցուպատասխանի ժամանակ ԱԺ պատգամավոր Նիկոլ Փաշինյանը նախ իր դժգոհությունը հայտնեց, որ բյուջեի կատարողականը ԱԺ-ում ներկայացնում է գլխավոր գանձապետ Ատոմ Ջանջուղազյանը, այլ ոչ թե նախարարները: «Սահմանադրությունը պետք է ներողություն խնդրի ձեզանից»,- դիմելով կառավարությանը՝ հեգնեց պատգամավորը:

Այնուհետև նա անդրադարձավ Ծառուկյանի բիզնեսների ստուգումների գործընթացին` ասելով, որ վարչապետը նախորդ հարցուպատասխաններից մեկի ժամանակ ասել էր, թե հունիսի 5-ից հետո պարզ կլինեն այդ ստուգումների արդյունքները, իսկ այսօր հունիսի 10-ն է:

Նիկոլ Փաշինյանը կրկին հիշեցրեց Սերժ Սարգսյանի հայտնի խոսքերը Գագիկ Ծառուկյանի մասին, նաև` Գագիկ Ծառուկյանի պատասխանը Սերժ Սարգսյանին, երբ մեկը մյուսին անվանեցին չարիք: «Հիմա երկու չարիքները միավորվեցին հունիսի 1-ին կինոթատրոնի բացման ժամանակ, ինչի կապակցությամբ շնորհավորում եմ»,- դարձյալ հեգնեց պատգամավորը:

Ուշագրավ է, որ վարչապետը հստակ պատասխաններից խուսափեց և սկսեց խոսել կառավարության անելիքների ու պարտականությունների մասին:

Նիկոլ Փաշինյան-Հովիկ Աբրահամյան հարցուպատասխանը՝ տեսանյութում: