Երևանը գավառական հոգեբանությամբ չի տառապում, հյուրին պետք է պատվով ընդունել. փոխքաղաքապետը՝ կոնյակի բաժակների մասին

«Կարդացեք պարոն Շաբոյանի հարցազրույցը, մարդը սպառիչ պատասխաններ է տվել: Պարոն Շաբոյանը տվել է պարզաբանումներ՝ ասելով, որ խոսքը քաղաքապետարանին չի վերաբերում, այլ տնտեսվարող սուբյեկտներին»,- ԱԺ-ում լրագրողների հետ զրույցում այսպես արձագանքեց Երևանի քաղաքապետի տեղակալ Կամո Արեյանը՝ դիտարկման հետ կապված, որ ՏՄՊՊՀ-ն զեկույց է հրապարակել, որում Երևանի քաղաքապետարանի չարաշահումները նկատելի են ասֆալտապատման ոլորտում:

Արեյանի խոսքով` ՏՄՊՊՀ նախագահը պաշտոնապես հայտարարել է, որ այդ հաշվետվությունը չի վերաբերում Երևանի քաղաքապետարանին: «Երևանի քաղաքապետարանը, ֆունկցիոնալ առումով, իր զննության օբյեկտը չէր, ինքը զբաղվելու է տնտեսվարող սուբյեկտների վարքագծով»,- ասաց նա:

Լրագրողների մեկի դիտարկմանը, որ կարծիք կա, թե Երևանի քաղաքապետարանն անիմաստ ծախսեր է իրեն թույլ տալիս, Կամո Արեյանը չհամաձայնեց՝ նշելով, որ քաղաքապետարանի բոլոր ծախսերը հաշվարկված են:  «Բյուջեում ներառելուց առաջ ունենք տնտեսագիտական հիմնավորում, որով դրանց անհրաժեշտությունն ու ծավալը հիմնավորված է, այնպես որ` մի' մտածեք, թե քաղաքապետարանում բյուջեն կազմում են աչքաչափով, քաղաքապետարանում պրոֆեսիոնալ մարդիկ են, որոնք բյուջեն կազմում են բյուջետային գործընթացին համապատասխան»,- ասաց նա:

Դիտարկմանը, թե կոնյակի բաժակներն ի՞նչ տնտեսական հիմնավորմամբ են ներկայացվում, Արեյանը շեշտեց, որ Երևանը «պակաս չէ աշխարհի ոչ մի քաղաքից»: «Երևանը գավառական հոգեբանությամբ չի տառապում: Երևանի քաղաքապետը գիտի իր ամեն հյուրին պատվով ընդունելու, ճանապարհելու եղանակը»,- ասաց նա: