Կիսով չափ մերկացրել են. ՕԵԿ-ականը մտահոգված է

ԱԺ հերթական քառօրյայում քննարկվում է մի համաձայնագիր, ըստ որի` Վերակառուցման և զարգացման եվրոպական բանկը (ՎԶԵԲ) ՀՀ-ին տրամադրում է 3,5 միլիոն եվրոյի վարկ: Վարկի նպատակն է աջակցել ՀՀ-ին կոշտ կենցաղային աղբի հավաքման ծախսերի ֆինանսավորման, թափոնների հավաքման, բեռնատարների, թափոնների համար կոնտեյներների ու արկղերի ձեռք բերման, ինչպես նաև աղբավայրի կառուցման համար:

ՕԵԿ-ական Հովհաննես Մարգարյանը հարց ուղղեց ՏԿԱԻ փոխնախարար Վաչե Տերտերյանին մայրուղիների աղտոտվածության մասին:

«Օրինակ` այսօր երբ գնում ենք Սևան, Չայնի կոչվող տարածքում` այն աղջկա արձանի մոտ, աղբանոց է դարձել, կիսով չափ մերկացրել են, ձեռքն են հանել, չգիտես` ինչ… Արդյո՞ք կա ծրագրի ենթատեքստում այս հարցերի լուծումը»,- հարցրեց պատգամավորը:

Վաչե Տերտերյանը նշեց, որ ճանապարհների խնդիրը փոքր-ինչ այլ է, եթե վարորդը աղտոտում է ճանապարհը, ապա կառավարությունը պետք է վարչական մեխանիզմներ ունենա դրա դեմ, քարոզչության համար, որ նման երևույթները պախարակվեն: Փոխնախարարը նաև հավելեց, որ վարկային ծրագիրն անուղղակիորեն կանդրադառնա նաև այդ խնդրին, և եթե կազմակերպված աղբահանություն անեն, մայրուղիների մոտ կուտակված աղբի մաքրման հարցը հնարավոր կլինի լուծել: