Միջազգային տնտեսական հանրության գնահատումներով` Հայաստանի ռիսկայնությունը կիսով չափ կրճատվել է. Նիկոլ Փաշինյան

Այս տարի Հայաստանի Հանրապետությունն, ըստ ամենայնի, կունենա 7 տոկոս տնտեսական աճ, «Իմ քայլը՝ հանուն Արագածոտնի մարզի» ներդրումային համաժողովի ժամանակ ասաց ՀՀ վարչապետ Նիկոլ Փաշինյանը։

«Սա չափազանց կարևոր է և բավականին բարձր ցուցանիշ է Եվրասիական տնտեսական միության տարածքում և ընդհանրապես ամբողջ եվրոպական տարածքում։ Իհարկե, հասկանալի է, որ մեր բազան շատ ցածր է, և 7 տոկոս տնտեսական աճն այն ցուցանիշը չէ, որից մենք պետք է շատ երջանիկ զգանք մեզ», - ասաց ՀՀ վարչապետ Նիկոլ Փաշինյանը։

Վարչապետի խոսքով՝ այս տարի Հայաստանի շուկայում, առաջին երեք եռամսյակների տվյալներով, Կենտրոնական բանկն  իրականացրել է շուրջ 433 միլիոն դոլարի գնում, այսինքն՝ ՀՀ շուկայում առաջին 9 ամիսների արդյունքներով 433 միլիոն դոլար հավելյալ արտարժութային միջոցներ են հայտնվել։