Մամեդյարովը ԵՄ-ից ԼՂ հարցով հստակ պատասխանի է սպասում

ԼՂ  հակամարտությունը շարունակում է  ուղղակի սպառնալիք լինել  Եվրոպական հարևանության քաղաքականության համար: Այս մասին հայտարարել է Ադրբեջանի ԱԳՆ ղեկավար  Էլմար Մամեդյարովը Եվրամիության «Արևելյան գործընկերության» երկրների արտգործնախարարների հանդիպման ժամանակ. հայտնում է АПА-ն:

Նրա խոսքով՝ Վիլնյուսյան գագաթաժողովից հետո տեղի ունեցած իրադարձությունները բազմաթիվ մարտահրավերներ են ստեղծել «Արևելյան գործընկերության» ողջ տարածքում:

«Եկել է ժամանակը միասնական դիրքորոշում հայտնելու տարածաշրջանի բոլոր հակամարտությունների վերաբերյալ: Մենք ԵՄ-ից հստակ պատասխան ենք ակնկալում տարածաշրջանում առկա մարտահրավերների առնչությամբ՝ հաշվի առնելով Ադրբեջանի ինքնիշխանության, տարածքային ամբողջականության հետ կապված նրա պարտականությունները»,- հայտարարել է նա:

Մամեդյարովը հավելել է, որ Ադրբեջանը բազմիցս խոսել է Խաղաղության մեծ համաձայնագրին ուղղված աշխատանքները սկսելու մասին: