ՀԱԿ-ը ադեկվատ պատասխանի է սպասում

Մարտիմեկյան հանրահավաքից հետո ՀՀԿ-ն հայտարարեց, որ իշխանությունները որեւէ վերջնագիր չեն ընդունում ՀԱԿ-ից: Այդ կապակցությամբ այսօր ՀԱԿ համակարգող Լեւոն Զուրաբյանը հայտարարեց, որ ՀՀԿ-ն ընդամենը «տղայական» պատասխան է հնչեցրել, եւ ըստ նրա` շարմազանովների կամ գալուստսահակյանների ասածը չի կարելի իշխանությունների պատասխան համարել:

«Ես կարծում եմ, որ այն, ինչ հանրահավաքից հետո հայտարարել են իշխանության ներկայացուցիչները, ընդամենը տղայական ռեակցիա է, բայց մենք էլ ցանկանում ենք բացատրել իշխանավորներին, որ խոսքը նրա մասին, չէ, թե ում ամբիցիան է բավարարվելու: Սա իրենք ընկալել են որպես մարտահրավեր իրենց ամբիցիաներին»,- ասաց Լ. Զուրաբյանը` հավելելով, որ խնդիրը շատ ավելի բարդ է:

ՀԱԿ ներկայացուցիչը նշեց, որ իշխանությունները դեռ մտածելու ժամանակ ունեն, եւ կոչ արեց զերծ մնալ ավտորիտար ու գողական մտածելակերպին հատուկ դրսեւորումներից` փորձելով մշակել ավելի ադեկվատ պատասխան: