«Պետք է վիրավորվենք Լուկաշենկոյից ու Նազարբաևից, ոչ թե Օբամայից ու Մերկելից»

Ազգային ժողովի պատգամավոր Ալեքսանդր Արզումանյանն այսօր, լրագրողների հետ խոսելով Հռոմի պապի՝ Հայոց ցեղասպանության զոհերի հիշատակին մատուցած պատարագի մասին, նշեց, որ Պապը` որպես 1 միլիարդ 200 միլիոն կաթոլիկների հովիվ, մեծագույն բարոյական աջակցություն ցուցաբերեց մեզ և խորին հարգանք ներշնչող արարք կատարեց:

«Այն, որ Թուրքիան Հռոմի պապին մեղադրում է կեղծարարության, ստի մեջ, սպառնում Սուրբ աթոռին, ուղղակի անհեթեթության հերթական դրսևորում է: Հուսանք, որ Թուրքիայի նման ոչ ադեկվատ պահվածքը կշարունակվի, ինչն էլ ավելի կբարկացնի միջազգային հանրությանը»,- ընդգծեց պատգամավորը՝ հավելելով, որ պետք չէ մտածել՝ ապրիլի 25-ին արթնանալու ենք մեր բոլոր պահանջատիրական նկրտումները բավարարված:

Ալեքսանդր Արզումանյանի դիտարկմամբ՝ ամերիկյան պետդեպում լուրջ դեբատ կա. մի մասը կարծում է, որ Օբաման պետք է արտասանի «ցեղասպանություն» բառը, մյուս մասն էլ հակառակ կարծիքին է:

«Մենք, իհարկե, լավ ենք անում, որ նրանից պահանջում ենք՝ ասել «ցեղասպանություն» բառը, և հույս ունենք, որ այս տարի Օբաման կառաջնորդվի համամարդկային արժեքներով, այլ ոչ՝ նեղ ազգային շահերով: Սակայն, միաժամանակ, մենք պետք է նեղանանք ոչ թե Օբամայից կամ Գերմանիայի կանցլեր Անգելա Մերկելից, ովքեր ապրիլի 24-ին չեն գալու Հայաստան, այլ, օրինակ, ԵՏՄ անդամ երկրների ղեկավարներից, օրինակ` Ղազախստանի նախագահ Նուրսուլթան Նազարբաևից կամ Բելառուսի նախագահ Ալեքսանդր Լուկաշենկոյից: Նրանց ղեկավարած երկրների հետ մենք գործընկերային հարաբերությունների մեջ ենք»,- ասաց Արզումանյանը: