Կվերադառնա՞ Մինասյանը ազգային հավաքական

Ֆուտբոլի Հայաստանի ազգային հավաքականը շարունակում է մնալ առանց գլխավոր մարզչի, սակայն ՀՖՖ նախագահ Ռուբեն Հայրապետյանը դեռևս չի ցանկանում խոսել հավաքականի նոր մարզչի նշանակման մասին, ավելին` վերջերս մեզ հետ զրույցում նա նշեց, որ այդ հարցով չի կարելի դիմել իրեն, և մատնացույց արեց  ՀՖՖ մամուլի քարտուղարությանը: 

Հայաստանի ազգային հավաքականը ստեղծման օրվանից գլխավորել է 15 մարզիչ, սակայն նրանցից ոչ մեկին չի հաջողվել  թիմին դուրս բերել Եվրոպայի կամ աշխարհի առաջնության եզրափակիչ փուլ:

Բեռնար Շալանդի հրաժարականից հետո հայկական ֆուտբոլային աշխարհը չի դադարում խոսել նոր մարզչի նշանակման մասին: Այս օրերին շարունակում են հնչել տարատեսակ կարծիքներ, նշվում են տարբեր մասնագետների անուններ, սակայն ՀՖՖ-ն դեռևս լռում է: Մեր տեղեկություններով՝ առավել շրջանառվում է Վարուժան Սուքիասյանի անունը, ով գլխավորել է մեր հավաքականը 2000-2001 թվականներին:  Հիշեցնենք, որ Yerkir.am-ի զրույցում Սուքիասյանը նշել էր, որ պատրաստ է գլխավորել ազգային թիմը:

Շրջանառվում է նաև «Փյունիկ»-ի և Հայաստանի երիտասարդական հավաքականի մարզիչ Սարգիս Հովսեփյանի անունը, իսկ երկրապագուների մեծ մասը ցանկանում է Մինասյանի վերադարձը: Այս ցանկությունն իրականանալու ավելի մեծ հնարավորություն ստացավ այսօր, երբ հայտնի դարձավ, որ Մինասյանը պաշտոնանկ է արվել ղազախական «Տոբոլ»-ի գլխավոր մարզչի պաշտոնից: Դժվար է պատկերացնել, որ Մինասյանը կկարողանա ավելի հեշտությամբ այլ աշխատանք գտնել, քան ազգային թիմը գլխավորելը:

Վարդան Մինասյանը  ազգային հավաքականի գլխավոր մարզիչ նշանակվեց 2009 թվականին: Մինչ այդ պաշտոնը ստանձնելը Մինասյանը քաջատեղյակ էր հայ ֆուտբոլիստների ներուժին և արդեն հասցրել էր աշխատել ազգային թիմի հետ` որպես գլխավոր մարզչի օգնական:

Երջանկահիշատակ Յան Պորտերֆիլդը, ով 2007-ին նշանակվեց հավաքականի գլխավոր մարզիչ, մեծ հույսեր արթնացրեց հայ երկրպագուների մոտ և ցույց տվեց, որ այս հավաքականն ունի հնարավոր բոլոր նախադրյալները` Եվրոպայի առաջնության ուղեգիր ձեռք բերելու  համար:  Յան Պորտերֆիլդից հետո հավաքականի մարզչի պաշտոնակատարներ նշանակվեցին շոտլանդացու օգնականներ Վարդան Մինասյանն ու Թոմ Ջոնսը: Այնուհետև ՀՖՖ-ն հայտարարեց հավաքականի նոր գլխավոր մարզչի անունը` Յան Պոուլսեն: Դանիացին,  1 տարի մնալով հավաքականի ղեկին, ձախողեց Մունդիալ 2010-ի ընտրական փուլը և գլխիկոր հեռացավ Հայաստանից:

Պոուլսենից հետո  հերթն արդեն Մինասյանինն էր: Հայ մասնագետն, արդեն որպես ազգային թիմի գլխավոր մարզիչ, առաջին խաղում նվազագույն հաշվով պարտվեց Էստոնիային:  Մունդիալ 2010-ի ընտրական փուլը մեր հավաքականն ավարտեց վերջին հորիզոնականում, սակայն, արդեն նոր ընտրական ցիկլում Մինասյանն ամբողջությամբ կերպարանափոխեց հավաքականը: Առավել քան երբևէ, հայ ֆուտբոլիստները Եվրոպայի առաջնությունում հայտնվելու ամենամեծ հնարավորություններն ունեցան հենց Մինասյանի օրոք: Եվրո-2012-ի ընտրական փուլում  հավաքականի ցույց տված արդյունքը լավագույնն էր պատմության ընթացքում:  Մեր հավաքականն ընտրական այդ փուլում, Մինասյանի գլխավորությամբ, 10 խաղերից 5-ում հաղթեց, կրեց 3 պարտություն և 2 անգամ ոչ-ոքի խաղաց մրցակիցների հետ:  Վաստակած 17 միավորով Հայաստանը խմբում գրավեց 3-րդ հորիզոնականը:  Ընտրական փուլի վերջին հանդիպումը, որտեղ որոշվում էր Հայաստանի ընտրանու՝ խմբից դուրս գալու հարցը, հայ երկրպագուների  համար  վերածվեց կատարյալ դրամայի: Իռլանիայից  կրած պարտությունը (2:1) դեռևս երկար կմնա հայ երկրպագուների հիշողության մեջ:    

Մունդիալ 2014-ի ընտրական փուլն այնքան էլ հաջող չդասավորվեց Մինասյանի համար: Ճիշտ է, մեկնարկային խաղում մեր տղաները նվազագույն հաշվով հաղթեցին Մալթային, սակայն դրան հետևեցին պարտություններ Բուլղարիայի (1:0), Իտալիայի (3:1), Չեխիայի (3:0) և Մալթայի (1:0) հավաքականներից: Դեռևս Երևանում Չեխիայի հավաքականից կրած 3:0 հաշվով պարտությունից հետո Մինասյանը հրաժարականի դիմում ներկայացրեց, սակայն ՀՖՖ-ն մերժեց այն:  Ընտրական փուլի ավարտից հետո Մինասյանը կրկին հրաժարականի դիմում ներկայացրեց, սակայն այս անգամ երիտասարդ մարզչին մտափոխել չհաջողվեց նույնիսկ ՀՖՖ նախագահին: 

Եվրոպայի առաջնության ընտրական այս փուլն արդեն կարելի է ավարտված համարել հայ ֆուտբոլիստների համար: Դժվար թե ՀՖՖ-ն հրավիրի արտասահմանցի մարզչի, քանի որ հաջորդ ընտրական փուլի մեկնարկին կա գրեթե 1,5 տարի, իսկ արտասահմանցի մարզիչ հրավիրելու համար մեծ գումարներ կպահանջվեն: Հավաքականի գլխավոր մարզչի պաշտոնի թեկնածուներից ամենահավանականների թվում թերևս Վարդան Մինասյանն է: Հատկանշական է, որ ՀՖՖ նախագահը բազմիցս նշել է, որ խոսել է և նույնիսկ անձամբ է փորձել  համոզել Մինասյանին, որպեսզի նա վերադառնա ազգային թիմ: Հավանական է, որ Հայրապետյանը հիմա էլ կփորձի քայլ կատարել՝ Մինասյանին վերադարձնելու համար: Իսկ թե որքանով կստացվի, կտեսնենք մոտ ապագայում:

Մինչ այդ հայ երկրպագուները սպասում են, թե այս անգամ ում հետ պետք է կապեն իրենց երազանքը: Երազանք, որի իրականացմանն արդեն  երկար տարիներ սպասում են հայ ֆուտբոլասերները, ովքեր  արդեն գրեթե 1 տարի է՝ «խեղդվում են» հաղթանակի ծարավից, իսկ այդ ծարավը հագեցնելը մեծապես կախված կլինի հավաքականի նոր մարզչից:

Մի բան հստակ է՝ ով էլ լինի նոր մարզիչը, հայ երկրապագուն շարունակելու է աջակցել և հավատալ իր սիրելի հավաքականին, չէ՞ որ պատմության ընթացքում դեռևս չենք ունեցել անհատապես այսպիսի  բարձրակարգ  ֆուտբոլիստներով համալրված Հայաստանի ազգային հավաքական:   

Երվանդ ՀԱԿՈԲՅԱՆ