ԵՏՄ երկրներից դեղերի ներմուծման կանոնակարգումը՝ կառավարության գերակա հարց

Այսօր կառավարության նիստում ՀՀ առողջապահության նախարար Արմեն Մուրադյանը ներկայացնում էր որոշման նախագիծ, որով կանոնակարգվում է ԵՏՄ երկրներից դեղերի ներմուծման գործընթացը:

Որոշման անհրաժեշտությունը բխում է այն հանգամանքից, որ Հայաստանի՝ ԵՏՄ-ին անդամակցելուց հետո անդամ երկրներից Հայաստան ներմուծվող դեղերը մաքսային հսկողության չեն ենթարկվում և առանց Հայաստանի կառավարության որոշմամբ նախատեսված լաբորատոր կամ փաստաթղթային փորձաքննության և ըստ դրանց արդյունքների տրվող հավաստագրի կարող են շրջանառվել ՀՀ տարածքում, ինչը ռիսկեր է պարունակում` ինչպես անորակ, ոչ արդյունավետ դեղերի, այնպես էլ չգրանցված կամ կեղծ դեղերի ՀՀ տարածք ներկրելու տեսանկյունից:

Որոշմամբ ակնկալվում է,  ԵՏՄ անդամ երկրներից ներմուծվող դեղերի և դեղանյութերի ներմուծման և իրացման համար նոր կարգավորումներ սահմանելով, բացառել անորակ, չգրանցված կամ կեղծ դեղերի ներկրումը և շրջանառությունը ՀՀ-ում:

ՀՀ վարչապետ Հովիկ Աբրահամյանը նշեց, որ ոչ միայն ԵՏՄ երկրներից, այլև երրորդ երկրներից դեղերի ներկրման հետ կապված լուրջ անելիքներ կան: «Լուրջ դժգոհություն ու մտահոգություն կա: Եվ ես հանձնարարել եմ առողջապահության նախարարին ու բոլոր պատկան մարմիններին` միասնական որոշում կայացնել, քննարկել ու տալ լուծում այս հարցին: Սա մեզ համար պետք է լինի գերակա խնդիր, որին որքան հնարավոր է շուտ պետք է լուծում տալ, որովհետև հասարակության մոտ իսկապես կա մտահոգություն»,- ասաց նա: