Տրանսպորտի գինը` 300 դրա՞մ

Տրանսպորտի սակագինը պետք է դառնա 300 դրամ, որից 200-ը պետք է կառավարությունը սուբսիդավորի, որպեսզի վարորդները կարողանան սովորականի պես շարունակել իրենց աշխատանքը: Այս մասին լրագրողների հետ հանդիպման ժամանակ ասաց Փոխադրողների միության նախագահ Հրանտ Եղիազարյանը:

Ըստ նրա` այն դեպքում, երբ վառելիքը թանկացել է, վարորդներն այլևս աշխատել չեն կարող, քանի որ «տակ են տալիս», այդ պատճառով էլ գործադուլ են հայտարարել:

«Օր օրի ավելանում է այն վարորդների թիվը, որոնք գալիս և բանալիները դնում են սեղանին ու ասում` գնում եմ Ռուսաստան: Այս պահին 212 մեքենա կա կանգնած, որոնք ուղղակի վարորդ չունեն: Ստեղծված իրավիճակում միակ ելքը պետության սուբսիդավորումն է, հակառակ դեպքում` եթե անգամ տրանսպորտի գինը դառնա 150 դրամ, մեկ է, մեզ ձեռք չի տալիս աշխատել»,- ասաց Եղիազարյանը:

Ըստ նրա`  դեռեւս 2013-ի դեկտեմբերին քաղաքապետարանը իսպանական կազմակերպություններից մեկի ներկայացուցիչներին հրավիրել էր Հայաստան, որպեսզի հաշվեն տրանսպորտի հնարավոր սակագինը, այն ժամանակ այդ գումարը կազմել էր 252 դրամ: Հիմա, ըստ Եղիազարյանի, վերջին թանկացումները հաշվի առնելով, այն պետք է լինի 300 դրամից ոչ պակաս:

Հարցին, թե, այնուամենայնիվ, եթե կառավարությունը չսուբսիդավորի անհրաժեշտ 200 դրամը, ի՞նչ է լինելու, Եղիազարյանը պատասխանեց, թե դժվար է ասել, բայց այն, որ սկզբում մատակարարող երթուղայինների թիվը կտրուկ կնվազի, փաստ է: «Մենք նույնպես չենք ուզում, որ տրանսպորտի սակագինը բարձրանա, իմ ընտանիքը 6 անդամից է բաղկացած, որոնցից 5-ը երթևեկում է հասարակական տրանսպորտով»,- ասաց նա: