Առաջարկում են խորհրդարանական լսումների մասին նյութերը ԱԺ կայքում հրապարակել ԱԺ նախագահի համաձայնությունից հետո. հանձնաժողովը դեմ արտահայտվեց

ԱԺ պետաիրավական հանձնաժողովում քննարկվում է  ՀՀԿ-ական պատգամավորների առաջարկած` «Հայաստանի Հանրապետության Ազգային ժողովի աշխատակարգը հաստատելու մասին» Հայաստանի Հանրապետության Ազգային ժողովի 2016 թվականի դեկտեմբերի 16-ի ԱԺՈ-267-Ն որոշման մեջ փոփոխություններ կատարելու մասին նախագիծը: Նախագծով առաջարկվում է խորհրդարանական լսումների անցկացումից հետո դրանց վերաբերյալ ամփոփ նյութերը ԱԺ պաշտոնական կայքում հրապարակել ԱԺ նախագահի համաձայնությունից հետո:

Հիմնական զեկուցող` ՀՀԿ-ական պատգամավոր Կարինե Աճեմյանն ասաց, որ ԱԺ նախագահը պետք է տեղյակ լինի, թե ինչ բովանդակություն են կրում լսումները:

Նախագծի այս դրույթին համաձայն չէր «Ծառուկյան» խմբակցության պատգամավոր Գևորգ Պետրոսյանը:  «Իմ կարծիքով` այստեղ լսումների իմաստը կորչում է: Եթե հանձնաժողովում խմբակցությունը լսումներ կազմակերպելու իրավունք ունի, ապա դիտարկում ենք նրան որպես այն պատասխանատու սուբյեկտը, որին տրվում է հանրային միջոցառում կազմակերպելու իրավունք, և նրան հետո զրկում ենք հրապարակելու իրավունքից: Դրանով լսումներ անցկացնելու իմաստը կորչում է»,- նշեց նա:

Ըստ Պետրոսյանի`  եթե օրենքը նման տեսքով մնա, ապա «Ծառուկյան» խմբակցությունը դեմ է քվեարկելու:

Կարինե Աճեմյանն էլ հակադարձեց, որ իրենք նպատակ չունեն նսեմացնել որևէ մեկի դերը՝ պնդելով, որ ԱԺ նախագահը պետք է տեղյակ լինի լսումների բովանդակությունից:

ԱԺ փոխնախագահ Արփինե Հովհաննիսյանն էլ առաջարկեց «ԱԺ նախագահի համաձայնություն» բառը փոխարինել «իրազեկմամբ» բառով:

Հանձնաժողովի նախագահ Գևրոգ Կոստանյանը համաձայնեց Արփինե Հովհաննիսյանի և Գևորգ Պետրոսյանի առաջարկների հետ՝ կոչ անելով փոփոխություններ կատարել նախագծում:  

Աճեմյանը համաձայնեց փոփոխություններով ներկայացնել նախագիծը և առաջարկեց այն մտցնել քառօրյա նիստերի օրակարգ: Հանձնաժողովը միաձայն որոշեց նախագիծն ընդգրկել հերթական քառօրյայի օրակարգում: