Անհնար է` ճանաչենք Հայոց ցեղասպանությունը. Թուրքիայի ԱԳ նախարար

«Ցեղասպանությունը, որ փորձում են վերագրել մեր պապերին և ժողովրդին, անհնար է` ճանաչենք: Մենք բազմիցս ընդգծել ենք դա»,-հայտարարել է Թուրքիայի ԱԳ նախարար Մևլութ Չավուշօղլուն:

Ըստ Medyalens-ի՝ երկրի արտաքին քաղաքականության մասին խորհրդարանի արտաքին հարաբերությունների հանձնաժողովին տեղեկություններ հաղորդելիս Չավուշօղլուն առանձնահատուկ անդրադարձել է նաև Հայկական հարցին:

Խոսելով նաև Շվեյցարիայում Հայոց ցեղասպանությունը հերքելու համար քրեական հետապնդման ենթարկված Աշխատավորական կուսակցության նախագահ Դողու Փերինչեքի դատի մասին` նա ասել է. «Մենք ուշադիր հետևում ենք նաև Փերինչեքի դատավարությանը: Փերինչեքի բողոքարկել էր Մարդու իրավունքների եվրոպական դատարանում եւ շվեյցարական դատարանի դատավճիռը ճանաչվել էր որպես մարդու իրավունքների ոտնահարում: Շվեյցարիան այդ գործը տեղափոխեց Մեծ պալատ, որին կողմ եղան նաև Ֆրանսիան և Հայաստանը»:

Շվեյցարիան դիմել էր Մարդու իրավունքների եվրոպական դատարան՝ Դողու Փերինչեքի գործը Մեծ պալատի կողմից վերանայելու պահանջով: Մարդու իրավունքների եվրոպական կոնվենցիայով նախատեսվում է Մեծ պալատ դիմել այն դեպքերում, երբ բարձրացվում է կոնվենցիայի մեկնաբանմանը կամ կիրառմանն առնչվող լուրջ հարց: