Նոր Թուրքիան փլուզվում է

Թուրքիայի նոր նախագահ Ռեջեփ Թայիփ Էրդողանն ու վարչապետ Ահմեդ Դավութօղլուն տարբեր առիթներով բազմիցս հանդես են եկել հայտարարություններով՝ շեշտելով «Նոր Թուրքիա» արտահայտությունը, որը մինչ օրս «հնից» ոչնչով չի տարբերվել: 

Այսօր թուրքական Taraf թերթը «Նոր Թուրքիան փլուզվում է» վերնագրով հոդված է հրապարակել, որում անդրադարձել է վերջին շրջանում Թուրքիայում տեղի ունեցած դեպքերին՝ երեկ Ավջըլար շրջանում բեռնատարի հարվածի արդյունքում փլուզված E-5 վերգետնյա անցումին, որի հետևանքով զոհվել էր 1 և վիրավորվել 4 քաղաքացի, Սոմայում տեղի ունեցած աղետին, որի արդյունքում մահացել էր 301 հանքափոր և նման այլ դեպքերի:

Թերթը տեղեկացրել է, որ երեկ փլուզված վերգետնյա անցումը կառուցվել է 2012 թվականին` Թուրքիայում հայտնի շինարարական երկու ընկերությունների կողմից, և դեպքից հետո այդ ընկերությունների մյուս աշխատանքները ևս փլուզման ենթարկվելու կասկածի տակ են ընկել: