Երեւանի կայազորն այսօրվանից նոր, մեծ ու հարմար հրաձգարան ունի Նուբարաշենում

Այսօր Նուբարաշենում հանդիսավորությամբ բացվեց պաշտպանության նախարարության Նուբարաշենի նոր հրաձգարան-զորավարժարանը: Այս հրաձգարանը, որը մինչ վերանորոգումն ու արդիականացումը գտնվել է ռուսական 102-րդ ռազմաբազայի տնօրինության տակ ու վերջերս է փոխանցվել ՀՀ ՊՆ-ին, արդիականացվել ու հարմարեցվել է ժամանակակից կրակային ու մարտավարական պատրաստության պարապմունքներ անցկացնելու համար:

Բացման արարողության ժամանակ, կարեւորելով ՀՀ զինված ուժերում զինծառայողների ուսումնական պարապմունքներն ու պրոցեսը անցկացնելու անհրաժեշտությունը, պաշտպանության նախարար Սեյրան Օհանյանը նշեց, որ Նուբարաշենի նոր հրաձգարանը ծառայելու է Երեւանի կայազորի ու երեւանամերձ տարածքներում տեղակայված զորամասերի զինծառակողների կրակային պարապմունքների անցկացման համար:

Շնորհավորելով զինվորներին ու սպաներին նոր հրաձգարան ունենալու կապակցությամբ, իսկ այնուհետեւ կարեւորելով ԶԼՄ-ների դերը թե' բանակաշինության գործում եւ թե' զինված ուժերին վերաբերող խնդիրների բացահայտման, բարձրաձայնման ու լուծման հարցում` Սեյրան Օհանյանը հրաձգարանը բացելու պատիվը շնորհեց 4 հոգու' մեկ շարքային զինվորի, մեկ սերժանտի, մեկ վաշտի հրամանատարի ու մեկ լրագրողի:

Այնուհետեւ զինծառայողներն ու սպաներն անցան կրակային պատրաստության դասապրոցեսին, իսկ լրագրողները, օգտվելով ընձեռված առիթից, փորձեցին իրենց ուժերը հրաձգության մեջ:

Ի դեպ, ՊՆ-ն հաճելի անակնկալ էր պատրաստել լրագրողների համար'  լավագույն հրաձիգ-լրագրողներն արժանացան պարգեւների: