Պոլիտկովսկայայի աղմկահարույց գործը. մեղադրյալներից երկուսը ցմահ ազատազրկվեցին

Մոսկվայի քաղաքային դատարանն այսօր մեղավոր է ճանաչել «Նովայա գազետա» թերթի լրագրող Աննա Պոլիտկովսկայայի սպանության գործով հինգ մեղադրյալներին:

Հանցագործության կատարողը` Ռուստամ Մահմուդովը, և կազմակերպիչը` Լոմ-Ալի Գայտուկաևը, դատապարտվել են ցմահ ազատազրկման: Նրանց հանցակիցները` Ջեբրայիլ Մահմուդովը, նրա եղբայր Իբրահիմը, ինչպես նաև իրավապահ համակարգի նախկին աշխատակից Սերգեյ Հաջիկուրբանովը, համապատասխանաբար, դատապարտվել են 14, 12 և 20 տարվա ազատազրկման:

Ե'վ Պոլիտկովսկայայի երեխաները, և' փաստաբանը, և' «Նովայա գազետայի» անձնակազմը պնդում են, որ դեռ վաղ է գործը փակված համարել, քանի որ սպանության պատվիրատուն ազատության մեջ է:

«Բազմաթիվ հարցեր են մնում պատվիրատուի մասով: Մենք պատրաստ ենք համագործակցել, այդ թվում` նաև դատապարտվածների հետ` հետաքննությունը շարունակելու համար»,- interfax.ru-ի հաղորդմամբ` ասել է Պոլիտկովսկայայի որդի Իլյան:

«Մենք դատավճռով բավարարված կլինենք միայն այն ժամանակ, երբ պատժվեն բոլոր մեղավորները և առաջին հերթին` պատվիրատուն»,- ասել է փաստաբան Աննա Ստավիցկայան:

«Նովայա գազետա» թերթի հիմնադիր Աննա Պոլիտկովսկայան հայտնի էր իր սուր հրապարակումներով, որոնցում հաճախ քննադատում էր ռուսաստանյան իշխանություններին, հատկապես` Կրեմլի քաղաքականությունը Չեչնիայում:

Պոլիտկովսկայան սպանվել էր իրենց շենքի վերելակում 2006թ. հոկտեմբերի 7-ին` նախագահ Պուտինի ծննդյան օրը: