Իրանը Հայաստանի տնտեսական քաղաքականության մեջ կարևոր գործընկեր է. էկոնոմիկայի նախարար

Այսօր կառավարության նիստից առաջ լրագրողները հարց ուղղեցին էկոնոմիկայի նախարարին Մեղրիում` հայ-իրանական սահմանի մոտ, նոր ազատ տնտեսական գոտի ստեղծելու մասին լուրերի վերաբերյալ: Կարեն Ճշմարիտյանը պատասխանեց, թե դա դեռ ծրագիր է, և որոշ մանրամասներ ներկայացրեց այդ կապակցությամբ:

Ըստ նրա` այդ տնտեսական գոտին նախատեսվում է հայ-իրանական համատեղ արդյունաբերական ձեռնարկություններ ստեղծելու համար: Նախարարն անչափ կարևորեց հայ-իրանական հարաբերությունները` նշելով, որ Իրանը Հայաստանի տնտեսական քաղաքականության մեջ կարևոր գործընկեր է, և հարկավոր է փորձել ցանկացած հնարավոր ուղղությամբ խորացնել այդ հարաբերությունները

Նախարարի խոսքով` այդ ծրագրով հետաքրքրված են ոչ միայն հայ և իրանցի, այլև բազմաթիվ սփյուռքահայ գործարարներ: Ազատ տնտեսական գոտու կայացման, գործողությունների համակարգման օպերատորը հայկական կողմից լինելու է Հայաստանի առևտրա-արդյունաբերական պալատը:

Ճշմարիտյանն անդրադարձավ նաև լրագրողների այն հարցին, թե ինչպե՞ս կանդրադառնան Արևմուտքի կողմից Իրանի նկատմամբ կիրառվող պատժամիջոցներն այդ ազատ գոտու գործունեության վրա և նշեց, որ այն ընկերությունները, որոնց դեմ կիրառվում են այդ պատժամիջոցները, Հայաստանի հետ առանձնապես կապ չունեն, և պատժամիջոցները, ըստ նախարարի, մեծ ազդեցություն չեն ունենա: