Հետաքննության բացահայտումը` Օդեսայի ողբերգության ժամանակ քլորոֆորմ է կիրառվել

Օդեսայի Արհմիությունների տանը բռնկված հրդեհի պատճառների հետաքննությունը հանգեցրել է անսպասելի եզրահանգումների: Այս մասին հայտնում է gazeta.ru-ն: Ուկրաինայի ներքին գործերի նախարարության գլխավոր քննչական վարչության պետ Վիտալի Սակալը հայտարարել է, որ այրված շենքում հայտնաբերվել է քլորոֆորմ:

Քլորոֆորմն անգույն հեղուկ է, դասվում է թմրամիջոցների թվին, առաջացնում է կենսական բոլոր ֆունկցիաների դարձելի կաթված: Նախկինում այն կիրառվում էր հիվանդի անզգայացման ժամանակ: Սակայն հետո հրաժարվեցին քլորոֆորմի կիրառումից` թունավոր լինելու պատճառով:

Հիշեցնենք, որ մայիսի 2-ին Օդեսայի Արհմիությունների տանը գրանցված անկարգությունների ու հրդեհի հետևանքով զոհվել էր 42 մարդ: Մինչ օրս էլ շատերը պաշտոնապես համարվում են անհետ կորած:

Մայիսի 19-ին Սակալը տեղեկացրել է, որ ուկրաինացի քննիչների անցկացրած փորձաքննությամբ հաստատվել է այրված շենքի աղբի ու մրի մեջ քլորոֆորմի առկայությունը:

«Քլորոֆորմի գոլորշին շնչելը հանգեցնում է շնչառության կանգի, ինչը տեղի է ունեցել մեր դեպքում: Զոհերից 32-ը մահացել են ոչ թե բարձր ջերմաստիճանից, այլ անհայտ նյութի ազդեցության արդյունքում սրտի կանգից և շնչահեղձությունից»,- ասել է Սակալը:

Մոսկվան դժգոհ է Օդեսայի ողբերգության հետաքննության ընթացքից և պահանջում է դրանում ներգրավել նաև ՄԱԿ-ին և ԵԱՀԿ-ին: