Թատրոնը սկսվում է այնտեղից, որտեղ վերջանում է բառի սահմանը

Ավարտվեց հերթական «Արմմոնո» միջազգային թատերական փառատոնը: Լրագրողների հետ զրույցում փառատոնի տնօրեն Մարիաննա Մխիթարյանը հավաստիացրեց` այս տարի նույնպես հանդիսատես-դերասան երկխոսությունը կայացավ: Նա տեղեկացրեց նաև, որ այս տարի փառատոնի շրջանակներում ցուցադրվել է 17 ներկայացում:

«Եթե կան տարբեր կարծիքներ այս կամ այն ներկայացման վերաբերյալ` նշանակում է` փառատոնը կայացավ: Մեր դերասանները, այո, ստացան հրավերներ այլ փառատոներից, բայց այդ մասին կտեղեկացնենք, երբ պաշտոնական հրավերը ձեռքներիս լինի»,- ասաց Մխիթարյանը` հավելելով, որ ընթացիկ տարում տեղի կունենան մի շարք մոնոներկայացումների պրեմիերաներ, որոնց կաջակցի «Արմմոնոն»:

Լիտվացի բեմադրիչ Սաուլիս Վառնասը նշեց, որ այնքան էլ հեշտ չէ նման փառատոն կազմակերպելը, քանի որ մոնոներկայացում բեմադրելն ինքնին դժվար է:

«Այս փառատոնի միջոցով, կարծես, պատուհան բացեք դեպի մյուս փառատոներ: Թատրոնն այնպիսի բան է, որ թարգմանելու կարիք չկա, թատրոնը սկսվում է այնտեղից, որտեղ վերջանում է բառի սահմանը»,- ասաց Վառնասը: