Որտեղ է սկսվում եւ ավարտվում ընտրական իրավունքը

Հաստատել ժողովրդի իշխանություն` ընտրական իրավունքի իրացման միջոցով. նման կոչ է այսօր հնչեցրել ՀՅԴ ԳՄ ներկայացուցիչ Արմեն Ռուստամյանը:

Ըստ նրա` ընտրական համակարգում առկա արատավոր դրսեւորումները հանգեցրել են այն բանին, որ ընտրողը, իր ձայնը չկարեւորելով, կա'մ վաճառում է այն, կա'մ` զիջում ուրիշին, իսկ դրանից, բնականաբար, օգտվում է իշխանությունը: Իշխանության վերարտադրությունը եւ ընտրական գործընթացների վրա նրա ունեցած անսանձ վերահսկողությունը կանխել հնարավոր է միայն ժողովրդական լայն շարժում ձեւավորելու միջոցով. համոզված է ՀՅԴ ներկայացուցիչը:

«Բացարձակապես կարեւոր չէ, թե ընտրողն իր ձայնը ում կտա, կարեւորը, նախեւառաջ, ընտրությունը կարեւորելն է: Քանի որ մեր իրավունքների բոլոր խախտումներն ու պաշտպանությունը սկսվում են ընտրական իրավունքից, հետեւաբար ընտրական իրավունքի պաշտպանությամբ կերաշխավորվեն թե' քաղաքական, թե' քաղաքացիական մնացած իրավունքները: Եթե ամեն ընտրող հասկանա, որ վաճառելով կամ զիջելով իր ընտրության իրավունքը, հետագա 5 տարիներին դրա դառը պտուղներն է քաղելու, կարծում եմ` շատ լուրջ փոփոխություն տեղի կունենա մեր մենթալիտետի մեջ»,- ընդգծեց Ռուստամյանը` հավելելով, որ սա պետք է լինի հասարակական բնույթի վերկուսակցական շարժում, որը կունենա իրավական, քաղաքական եւ վերահսկողական-կազմակերպական ասպեկտներ:

ՀՅԴ ներկայացուցչի համոզմամբ` իշխանափոխության իրատեսական ճանապարհը հենց սա է: